چاغی(حاجی عبدالستار)پاک ایران سرحد پر مقامی لوگوں کی آمدورفت کیلئے راہداری گیٹ چار سال بعد کھول دیا گیا ۔ راہداری گیٹ فروری 2020 میں کورونا کی بگڑتی صورتحال کے پیش نظر بند کیا گیا تھا ۔ سرحد کے دونوں اطراف بسنے والے بلوچ قبائل کی سہولت کے پیش نظر آج سے گیٹ باقاعدہ کھول دیا گیا ۔ اسسٹنٹ کمشنر تفتان بلال احمد نے سادہ تقریب میں راہداری دوبارہ کھولنے کا افتتاح کیا ۔ راہداری گیٹ سے صرف سرحد کے دونوں اطراف لوگ عزیز رشتہ داروں سے ملنے جاسکتے ہیں ۔ سرحد عبور کرنے کی راہداری ڈی سی آفس سے 15 روز کیلئے جاری ہوتی ہے ۔ راہداری معاہدہ 1985میں چاغی بارڈر کے اطراف لوگوں کی آمدورفت کے پیش نظر پاکستان اور ایران کے درمیان طے پایا تھا ۔ چاغی میں پاک ایران بارڈر پر چار گیٹ قائم ہیں ۔ راہداری اور زیرو پوائنٹ مقامی لوگوں کی آمدورفت کیلئے جبکہ ایف آئی اے امیگریشن اور بازارچہ ٹرمینل تجارتی مقاصد کیلئے استمعال ہوتے ہیں ۔ یوسی چیئرمین نوکنڈی عبدالودود سنجرانی ، رسالدار میجر سردار اکبر جان سنجرانی عمائدین اور قبائلی کے نمائندے بھی تقریب میں موجود تھے ۔