بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

کتے نے مالک کو گولی مار دی، مالک موقع پر ہی ہلاک

کنساس: امریکی ریاست کنساس میں ایک پالتو کتے نے مالک کو ’غلطی‘ سے گولی مار کر ہلاک کر دیا۔

غیر ملکی میڈیا رپورٹس کے مطابق ہفتے کے روز کنساس میں ایک شخص کی موت اس وقت واقع ہوئی جب حکام کے مطابق ٹرک میں موجود رائفل پر اس کے پالتو کتے نے پیر رکھ دیا تھا۔

یہ واقعہ کنساس کے شہر وچیتا میں پیش آیا، 32 سالہ جوزف آسٹن اسمتھ صبح کے وقت ایک ٹرک میں مردہ پایا گیا، وچیتا کے علاقے سمنر کی پولیس نے واقعے کے بعد بتایا کہ وہ شخص شکار کے ارادے سے اپنی گاڑی میں جا رہا تھا اور اس دوران ہی واقعہ پیش آیا۔

پولیس کے مطابق جوزف اسمتھ گاڑی کی اگلی سیٹ پر بیٹھے اور ساتھ والی سیٹ شکار کی بندوق پڑی تھی، اس دوران کتا پیچھے والی سیٹ سے اگلی سیٹ پر آیا تو اس کا پاؤں ٹریگر کے اوپر آ گیا اور گولی چل گئی۔

پولیس کے مطابق گولی لگنے کے فوراً بعد جوزف دم توڑ گیا تھا، اس کے بارے میں معلوم ہوا ہے کہ وہ پلمبر کا کام کرتا تھا۔

شیرف آفس کی جانب سے جاری ہونے والے ایک بیان میں کہا گیا کہ واقعے کے حوالے سے مزید تحقیقات بھی کی جا رہی ہیں تاہم اب تک سامنے آنے والے شواہد سے عیاں ہے کہ یہ حادثاتی طور پر ہی رونما ہوا۔

امریکا کے شعبہ صحت کا کہنا ہے کہ 2021 کے دوران حادثاتی طور پر گولی چلنے سے 500 سے زائد افراد ہلاک ہوئے۔