اسلام آباد(ممتاز نیوز ) پاکستان پیپلز پارٹی ورکرز کے رہنما و سابق پولیٹیکل سیکرٹری ناہید خان اورڈاکٹر صفدر عباسی نے عوامی مسلم لیگ کے سربراہ شیخ رشید کی گرفتاری پر شدید تشویش کا اظہار کرتے ہوئے ایک عام شہری کی جانب سے درج ایک غیر سنجیدہ شکایت پر اور پولیس کے اس وحشیانہ فعل کی شدید مذمت کی ۔اورکہا کہ جس طرح شیخ کو گرفتار کیا گیا اور ان کے گھر کے دروازے اور کھڑکیوں کے شیشے توڑ ے گئیے قابل تشویش ہے, حکومت پاکستان کے 1973 کے آئین کے مطابق عوام کے حقوق کا احترام کرے اور سیاسی مخالفین کو نشانہ بنانا بند کرے۔ یہ انتہائی شرمناک اور قابل مذمت عمل ہے۔ ہمیں ایک مہذب قوم کی طرح نظر آنا چاہیے۔ پاکستان ایک بار پھر دہشت گردوں کے نشانے پر ہے اور اس تشویشناک صورتحال میں پاکستان کا وجود ہی ایک چیلنج بن گیا ہے۔ گزشتہ چند دنوں میں سینکڑوں بے گناہ شہریوں کو دہشت گردوں نے نشانہ بنایا ، حکومت قوم کو متحد کرنے کی بجائے پہلے سے سلگتی ہوئی صورتحال میں مزید تیل ڈال رہی ہے۔ پاکستان کو مشکل ترین معاشی صورتحال کا سامنا ہے۔ مارکیٹ میں ڈالر دستیاب نہیں ہے۔ برآمدات میں کمی آئی ہے۔ ڈالر کی عدم دستیابی کی وجہ سے درآمدات پھنس گئی ہیں۔ قیمتوں میں اضافہ اپنے عروج پر ہے۔ لوگ اپنے خاندانوں کو بنیادی ضروریات فراہم کرنے سے قاصر ہیں، صحت، تعلیم اور ہمارا سماجی ڈھانچہ مکمل طور پر تباہ ہو چکا ہے۔ نئے انتخابات جلد از جلد کرائے جائیں تاکہ اگلی منتخب حکومت عوامی مینڈیٹ کے ساتھ معیشت کو درست سمت پر گامزن کرے اور پاکستان کو آئی ایم ایف کے غیر معقول مطالبات سے نجات دلائے , ہم شیخ رشید احمد کی فوری رہائی کا مطالبہ کرتے ہیں۔