اسلام آباد(وقائع نگار)وفاقی وزیر اطلاعات مریم اورنگزیب نے کہا ہے کہ ملک کے قانون کو جنگل کا قانون بنانے والے نے دو دن سے آئین، قانون کو یرغمال بنایا ہوا ہے، آج یہ تماشا پوری قوم اور دنیا دیکھ رہی ہے۔ اپنے ایک بیان میں مریم اورنگزیب نے کہا کہ انصاف اور قانون کا پورا نظام ایک شخص کی ضد، انا اور تکبر کے سامنے بے بس نظر آتا ہے، ایک ذہنی مریض کی انا آئین، قانون، عدالت سمیت ہر چیز سے بڑی ہے۔ انہوں نے کہا کہ ‏اللہ کی شان کہیں یا مکافات عمل! وفاقی وزیر اطلاعات نے کہا کہ سیاسی مخالفین کی بیماریوں، پلیٹ لیٹس،ہسپتال میں آخری سانس لیتے مریضوں اور ان کے اہل خانہ کے احساسات کا تمسخر اڑانے والا آج “بزرگ” اور “بیمار” بن گیا ہے۔ان کا کہنا تھا کہ ایک شخص اپنی ضد، انا اور تکبر میں آئین، قانون، کسی جج اور عدالت کو ماننے کو تیار نہیں۔