لاہور: پاکستان تحریک انصاف کے مرکزی سیکرٹری جنرل اسد عمر نے کہا ہے کہ پاکستانی قوم صدر مملکت کی طرف دیکھ رہی ہے، صدر پاکستان سے گزارش ہے کہ ملک کو آئینی بحران سے نکالیں۔
انہوں نے کہا کہ عمران خان کی تمام جدوجہد آئین و قانون کے دائرے کے اندر رہی ہے، یہ عمران خان کے خوف سے الیکشن اور عوام سے بھاگنا چاہتے ہیں۔
اسد عمر نے کہا کہ موجودہ حکو مت رجیم چینج آپریشن کی سازش کے نتیجے میں آئی، سندھ ہاؤس میں منڈی لگا کر آئے تھے یہ عوام میں جانے کوتیار نہیں ہیں۔
پی ٹی آئی رہنما اسد عمر نے کہا کہ انہوں نے واضح کردیا ہے کہ آئین توڑنے کو بھی تیار ہیں، موجودہ حکومت عوام کے سامنے جانے کو تیار نہیں ہیں جب کہ ہم آئین اور جمہوریت پر یقین رکھتے ہیں۔