اسلام آباد (مانیٹرنگ ڈیسک) وفاقی وزیر قانون اعظم نذیر تارڑ نے کہا ہے کہ عمران خان خود جیل جانے کی بجائے عوام کو جیل بھرو تحریک پر اکسا رہے ہیں، خود 4 ماہ سے ٹانگ پر پٹی باندھ کر زمان پارک میں بیٹھے ہیں۔

سینیٹ اجلاس میں خطاب کرتے ہوئے وزیر قانون اعظم نذیر تارڑ کا کہنا تھا کہ تقریریں کرتے ہوئے 4 سال پیچھے جائیں، آئی ایم ایف سے معاہدہ کس نے کیا۔ سٹیٹ بینک کی پالیسیز ، مارک اپ، فارن کرنسی ریٹ معاہدے پر دستخط کس نے کئے۔ بجلی کی قیمتوں میں اضافے کے معاہدے پر آئی ایم ایف سے معاہدے کس نے کئے۔ ٹائم بم معاشی بدحالی، بارودی سرنگیں کس نے بچھائی تھیں ۔ تاریخ گواہ ہے اسی ایوان میں ہم نے آواز اٹھائی کہ ہاتھ کاٹ کر مت دیں۔

انہوں نے کہا کہ عمران خان جیل بھرو تحریک کی بات کرتے ہیں مگر خود حفاظتی ضمانت کی درخواستیں دے رکھی ہیں۔ جیل بھرو تحریک غریبوں اور جذباتی کارکنوں کیلئے ہے عمران خان کیلئے نہیں۔ گذشتہ دور میں اپوزیشن نے 3،3 سال جیلیں کاٹی ہیں۔ عدالتوں کی طرف انگلیاں اٹھانے والے اپنے گریبانوں میں جھانکیں۔