لاہور قلندرز کے ٹاپ آرڈر بیٹر عبداللّٰہ شفیق نے کہا ہے کہ میں نے خود کو ایک فارمیٹ کے لیے محدود نہیں رکھا ہوا جو فارمیٹ ملے اس کو اس کی ضرورت کے مطابق کھیلتا ہوں۔
ٹیسٹ کرکٹر عبداللّٰہ شفیق نے جیو نیوز سے گفتگو کرتے ہو ہے کہا کہ پی ایس ایل کے پہلے 3 میچز کے لیے میں کمبی نیشن میں سیٹ نہیں ہوسکا تھا، میں نے اس وقت مینجمنٹ کے فیصلے کو قبول کیا اور پریکٹس جاری رکھی، جب مجھے موقع ملا تو میں نے پرفارم کیا اور امید ہے تسلسل کو برقرار رکھوں گا۔
عبداللّٰہ شفیق کا ماننا ہے کہ ہر فارمیٹ کے لیے کرکٹ کی بنیادی چیزیں ایک ہی ہوتی ہیں۔
انہوں نے کہا کہ میرے دماغ میں یہی ہوتا ہے کہ جو بال ملے اسے میرٹ کے مطابق کھیلوں، ہر فارمیٹ کو اس کے اسٹرائیک ریٹ کے مطابق کھیلنا پڑتا ہے۔
عبداللّٰہ شفیق نے کہا کہ فخر زمان اس وقت بولروں کی لائن لینتھ تباہ کرنے والے بیٹرز میں سے ہیں، ان سے بہت کچھ سیکھنے کی کوشش کرتا ہوں، ان کی پاور ہٹنگ کی اسٹرینتھ کو سیکھ رہا ہوں، وہ مومینٹم کو لے کر چلتے ہیں، ان کی وجہ سے لاہور قلندرز کی بیٹنگ مضبوط ہے، بابر اعظم سے بھی میں بہت کچھ سیکھ رہا ہوں۔
انہوں نے بتایا کہ پشاور کے خلاف میچ سے قبل انضمام الحق جیسے کھلاڑی سے بھی ٹپس لیں، میں سمجھتا ہوں کہ مجھے کوئی بھی بیٹر ملے مجھے اس سے ضرور کچھ نہ کچھ سیکھنا چاہیے، جس کھلاڑی نے ملک کے لیے اچھا کیا میں سیکھنے کے لیے اس کے پاس جانے میں شرم محسوس نہیں کرتا۔
