نیوزی لینڈ کو چوتھے ون ڈے میچ میں شکست دینے کے بعد پاکستان کرکٹ ٹیم اس فارمیٹ میں نمبر ون ٹیم بنی تو وزیراعظم شہباز شریف بھی اپنی خوشی اور خیالات کا اظہار کیے بغیر نہ رہ سکے۔
گزشتہ روز کپتان بابر اعظم کی سنچری کی بدولت پاکستان نے نیوزی لینڈ کے خلاف چوتھا ون ڈے انٹرنیشنل 102رنز کے بڑے مارجن سے جیت کی تاریخ میں پہلی بار آئی سی سی ون ڈے رینکنگ میں پہلی پوزیشن حاصل کی۔
اس موقع پر وزیراعظم شہباز شریف نے سوشل میڈیا پیغام کے ذریعے اپنی خوشی اور جذبات کا اظہار کیا۔
وزیراعظم نے لکھا کہ آج کا دن بہت اچھا ہے کیونکہ پاکستان ون ڈے کرکٹ کی ٹاپ ٹیم بن گئی ہے، گرین شرٹس نے نیوزی لینڈ کو شکست دے کر شاندار طریقے سے آئی سی سی رینکنگ میں ٹاپ پوزیشن حاصل کی۔
شہباز شریف نے لکھا کہ قوم کا سر فخر سے بلند کرنے والے کپتان بابر اعظم جنہوں نے ون ڈے میں تیز ترین 5000 رنز مکمل کیے اور پاکستان کرکٹ کو اس اعزاز تک پہنچانے کا کارنامہ انجام دیا۔
Today is a great day as Pakistan has become the top-ranked ODI cricket team. The manner in which the Green Shirts have defeated New Zealand to book a top slot in the ICC rankings is simply outstanding.
Making the nation proud is skipper Babar Azam who earned the feat of…
— Shehbaz Sharif (@CMShehbaz) May 5, 2023
وزیراعظم نے لکھا کہ پاکستان کرکٹ ٹیم، پی سی بی، بابر اعظم اور قوم کو میری طرف سے دلی مبارکباد۔
واضح رہے کہ پاکستان کو نیوزی لینڈ کے خلاف ون ڈے سیریز میں چار صفر کی برتری حاصل ہوگئی ہے اور دونوں ٹیموں کے درمیان آخری میچ کل کراچی میں کھیلا جائے گا۔
اس سے قبل دونوں ٹیموں کے درمیان کھیلی جانے والی ٹی ٹوئنٹی سیریز 2-2 سے برابر ہوئی تھی۔
