اسلام آباد: سپریم کورٹ میں پنجاب انتخابات الیکشن کمیشن کی نظر ثانی درخواست پر سماعت شروع ہونے کے کچھ دیر بعد ہی ملتوی کر دی گئی۔
چیف جسٹس پاکستان عمر عطا بندیال کی سربراہی میں تین رکنی بینچ نے کیس کی سماعت کی۔ اٹارنی جنرل روسٹرم پر آئے تو بینچ پر اعتراض کر دیا۔
اٹارنی جنرل نے موقف دیا کہ سپریم کورٹ ری ویو ایکٹ اب قانون بن چکا ہے اور نئے ایکٹ کے تحت نظر ثانی کا دائرہ کار اب اپیل جیسا ہی ہوگا، اب نظر ثانی کا فیصلہ دینے والے بینچ سے لارجر بینچ ہی سن سکے گا۔
چیف جسٹس نے ریمارکس دیے کہ یہ تو بڑا دلچسپ معاملہ ہوگیا ہے، یہ عدالت عدلیہ کی آزادی کے بنیادی حق کو بھی دیکھتی ہے۔ ایک دوسرا کیس بھی جمعرات کو مقرر ہے لہٰذا آپ اس سے متعلق بھی ہدایات لے لیں۔
اٹارنی جنرل کے دلائل کے بعد سپریم کورٹ نے کیس کی سماعت ملتوی کر دی۔ جسٹس اعجاز الاحسن اور جسٹس منیب اختر بینچ کا حصہ ہیں۔
