لاہور:پاکستان مسلم لیگ ق کے سربراہ چودھری شجاعت حسین نے کہا ہے کہ اس وقت تمام سیاستدانوں کو متحد ہو کر ملک کے لیے سوچنا ہو گا۔
جماعت اسلامی کے نائب امیر لیاقت بلوچ نے سابق ممبر قومی اسمبلی فرید پراچہ کے ہمراہ چودھری شجاعت حسین کی رہائشگاہ کا دورہ کیا۔
ملاقات کے دوران لیاقت بلوچ نے شجاعت حسین سے خیریت دریافت کی جبکہ موجودہ سیاسی صورتحال پر تبادلہ خیال کیا گیا۔
اس موقع پر چودھری شجاعت حسین نے کہا کہ 9 مئی کے واقعات کی جتنی بھی مذمت کی جائے کم ہے، اس وقت تمام سیاستدانوں کو متحد ہو کر ملک کے لیے سوچنا ہو گا۔
اس موقع پر لیاقت بلوچ نے کہا کہ ملک میں مہنگائی، بیروزگاری نے عوام کا جینا محال کر دیا ہے، تمام مسائل کا حل ڈائیلاگ سے ہی ممکن ہے، سیاسی عدم استحکام کے لیے ضروری ہے کہ الیکشن وقت پر ہوں۔