نئی دہلی(مانیٹرنگ ڈیسک) بھارتی فوج کے سربراہ جنرل منوج پانڈے نے کہا ہے کہ بھارتی فوج نے مشرقی لداخ میں لائن آف ایکچول کنٹرول ( ایل اے سی) پر صورتحال کو تبدیل کرنے کی چینی کوششوں کا مناسب جواب دیا ہے۔ بھارتی فوج کے 29ویں سربراہ کی حیثیت سے عہدہ سنبھالنے کے بعد بھارتی خبر رساں ادارے ’’اے این آئی‘‘ کو دیئے گئے انٹرویومیں جنرل منوج پانڈے نے کہا کہ ایل اے سی پر صورتحال اب معمول پر ہے۔جنرل پانڈے نے کہا کہ ہمارے مخالف کی جانب سے موجودہ صورتحال کو تبدیل کرنے کے لیے یکطرفہ اور اشتعال انگیز کارروائی کی گئی، جس کا میرے خیال میں مناسب جواب دیا گیا ہے۔ انہوں نے کہا کہ گزشتہ دو برسوں میں فوج نے خطرے کا اندازہ لگایا ہے اور اپنی افواج کو دوبارہ منظم کیا ہے۔ انہوں نے کہا کہ جہاں تک ایل اے سی کی موجودہ صورتحال کا تعلق ہے، ہمارے سپاہی اس بات کو یقینی بنانے کے لیے وہاں موجود ہیں کہ موجودصورتحال میں کوئی تبدیلی نہ آئے۔ جنرل منوج پانڈے نے کہاکہ فوج کی توجہ آپریشنل اور لاجسٹک ضروریات کو پورا کرنے کے لیے انفراسٹرکچر کی ترقی پر ہے۔ یاد رہے کہ مشرقی لداخ میں ہندوستان اور چین کے فوجیوں کے درمیان خونریز جھڑپ کے بعد سے دونوں ممالک کی افواج کے درمیان مذاکرات کے کئی دور ہو چکے ہیں۔