روس کی ایک جیل میں قیدی کے فرار کا عجیب و غریب واقعہ پیش آیا، قیدی عین اس روز جیل سے فرار ہوگیا جس دن 22 برس کی قید کی سزا کاٹنے کے بعد اسے پرول پر رہا ہونا تھا۔
غیر ملکی میڈیا کے مطابق کامولجون کالونوف نامی یہ شخص 22 برس قبل سنگین جرائم کے ارتکاب کے الزام پر قید کی سزا کاٹ رہا تھا۔
روسی میڈیا کی رپورٹ کے مطابق اسے دہرے قتل، چوری، غیر قانونی اسلحہ، ایمونیشن، دھماکا خیز مواد اور دھماکا کرنے والے آلات رکھنے کے جرم میں سزا ہوئی تھی۔
جس کے بعد وہ 22 برس سے ایک ایسے قید خانے میں تھا جہاں اندرونی طور پر کافی آزادی ہوتی ہے۔ لیکن اسے اس طویل قید کے بعد گزشتہ ہفتے ضلع آرکوٹسک جیل سے رہا ہونا تھا۔
تاہم رہائی والی صبح کے 4بجے روس کی وفاقی پینیٹینشری سروس کے علاقائی دفتر نے بتایا کہ کامولجون کالونوف قید خانے سے کسی کو بھی بتائے بغیر غائب ہے اور امکانی طور پر وہ فرار ہوگیا ہے۔
بتایا جاتا ہے کہ اسے پرول پر رہائی کے بعد فورس لیبر (جبری مزدوری) کے لیے بھیجا جانا تھا لیکن بظاہر اس نے رہائی والے دن ہی فرار کا فیصلہ کیا۔