اسلام آباد: مسلم لیگ ن کے سینئر رہنما و سابق وفاقی وزیر خرم دستگیر نے کہا ہے کہ جو پارٹی چھوڑ کر جا رہے ہیں اس کی بہتر وضاحت وہی دے سکتے ہیں۔
نجی ٹی وی سے گفتگو کرتے ہوئے خرم دستگیر نے کہا کہ مسلم لیگ ن کے امیدواروں کے ٹکٹ کیلئے انٹرویوز ہو رہے ہیں اور کاغذات نامزدگی جمع ہونے کے فورا بعد ن لیگ کی مہم شروع ہوگی ۔
انہوں نے کہا کہ ہر جماعت الیکشن سے پہلے اپنے اعتماد کااظہار کرتی ہے لیکن معاملہ عوام کے ہاتھ میں ہے، اس وقت ملک کو سیاسی استحکام کی ضرورت ہے، اور سیاسی استحکام کیلئے ہمیں نواز شریف کے ہاتھ مضبوط کرنے ہیں۔
میری ذاتی رائے ہے بہت ساری نشستوں پر ن لیگ کوغیر متوقع کامیابی ملے گی،اپریل 2018تک مسلم لیگ ن الیکشن جیت رہی تھی، اس کے بعد کیا ہوا یہ سب جانتے ہیں۔
خرم دستگیر نے کہا کہ جو پارٹی چھوڑ کر جا رہے ہیں اس کی بہتر وضاحت وہی دے سکتے ہیں، شاہد خاقان عباسی اورسردارمہتاب عباسی میرے قابل احترام ہیں، سردار مہتاب عباسی سے 2018کے الیکشن میں بھی ن لیگ کی حمایت نہیں کی تھی۔پرامید ہوں شاہد خاقان عباسی کی حد تک ن لیگ کو کسی مخالفت کا سامنا نہیں ہوگا، شاہد خاقان عباسی مسلم لیگ ن سینئر ترین عہدوں پر فائر رہے ہیں، شاہد خاقان سے استدعا ہے کہ موجودہ بحرانوں کا ان کے پاس حل ہے تو سامنے لائیں،جن بحرانوں کی طرف وہ نشاندہی کرتے ہیں ان سے لڑنےکا طریقہ یہی ہے کہ انتخابات لڑا جائے۔ ہماری خواہش ہے کہ شاہد خاقان عباسی مسلم لیگ ن کی طرف سے الیکشن لڑیں۔
رہنما ن لیگ کا کہنا تھا کہ سیاست میں کبھی بھی آپ کو آئیڈل حالات نہیں ملتے، آئی پی پی کے ساتھ ابھی صرف ابتدائی گفتگو ہوئی ہے، مسلم لیگ ق کے ساتھ ایڈجسٹمنٹ ہوگی، تاہم آئی پی پی کے ساتھ ایڈجسٹمنٹ کا ابھی تک حتمی فیصلہ نہیں ہوا۔
انکا مزید کہنا تھا کہ ایک جماعت کا خیال تھا کہ ان کے علاوہ باقی سب غدار اور چور ہیں، اب ہم ایک مفاہمت اور باہمی احترام کے دور میں آرہے ہیں۔
