اسلام آباد: وفاقی وزیر صحت ڈاکٹر ندیم جان نے پاکستان میں فارما پارک کے نئے دور کا آغاز کر دیا ۔  وزیر صحت ڈاکٹر ندیم جان نے 2 خام مال مینوفیکچرنگ یونٹس کا سنگ بنیاد رکھا، انہوں نے کہاکہ یونٹس چھ ماہ کے اندر ایکٹیو فارما سوٹیکل اجزاء (APIs) کی پیداوار شروع کریں گے،  مستقل بنیادوں پر ادویات کی فراہمی کو بہتر بنانے کیلیے مربوط حکمت عملی تشکیل دی ہے۔انہو ں نے کہاکہ یونٹس کے قیام سے ملک میں دوائیں بنانے کیلئے ضروری اجزاء کی مقامی پیداوار میں اضافہ ہو گا ،لوکل پیداوار سے نہ صرف ملکی ضروریات پوری ہوں گی بلکہ برآمدات میں بھی اضافہ ہوگا۔ ندیم جان نے کہاکہ یہ منصوبہ ملکی صحت کے شعبے کو خود انحصاری کی طرف گامزن کرے گا، حکومت پروموشن پالیسی کے تحت API مینوفیکچررز کی مختلف طریقوں سے مدد کر رہی ہے۔ ڈاکٹر ندیم جان نے کہاکہ حکومتی سہولیات میں آسان قرض، ٹیکس رعایت اور تکنیکی مدد شامل ہے، مجھے یقین ہے کہ اس پالیسی سے ملکی فارما سوٹیکل انڈسٹری کو فروغ ملے گا، پاکستان کی فارما انڈسٹری ملین ڈالر کی ادویات امپورٹ کرتی ہے۔انہوں نے کہاکہ  پاکستان کو ادویات کے شعبے میں خود کفیل دیکھنے کیلے عملی اقدامات کیے جارہے ہیں، مختصر مدت میں ہیلتھ کے شعبے میں بڑے پیمانے پر اصلاحات کی ہیں  ،عوام کو بہترین طبی سہولیات کی فراہمی کو یقینی بنانے کیلیے پر عزم ہیں۔