دبئی (سپورٹس ڈیسک) آئی سی سی ویمنز ٹی20 ورلڈکپ کی تیاریوں کے سلسلے میں قومی ٹیم آج اور کل پریکٹس سیشن میں حصہ لے گی۔پاکستان کرکٹ بورڈ (پی سی بی) کی جانب سے جاری کردہ اعلامیے کے مطابق ویمنز ٹیم آج دوپہر 2 بجے سے 5 بجے تک آئی سی سی اکیڈمی اوول میں پریکٹس کرے گی۔ہیڈ کوچ محمد وسیم، فاسٹ بالنگ کوچ جیند خان، اسپن بالنگ کوچ عبدالرحمن اور فیلڈنگ کوچ حنیف ملک کھلاڑیوں کو تینوں شعبوں میں اہم تجاویز فراہم کریں گے۔ قومی ویمنز ٹیم اسکاٹ لینڈ اور بنگلادیش کے خلاف وارم اپ میچ بھی کھیلے گی۔ پاکستانی ٹیم ایونٹ میں اپنا پہلا میچ 3 اکتوبر کو سری لنکا کے خلاف اور 6 اکتوبر بروز اتوار کو روایتی حریف بھارت کے خلاف میدان میں اترے گی۔ بعد ازاں، پاکستانی ویمنز ٹیم 11 اکتوبر کو آسٹریلیا اور 14 اکتوبر کو نیوزی لینڈ کے خلاف بھی مقابلہ کرے گی۔