ممبئی (شوبز ڈیسک) بالی ووڈ کے معروف فلم میکر کرن جوہر نے انکشاف کیا ہے کہ انہوں نے اپنی فلموں میں مرد اداکاروں کو بھاری معاوضے دینا بند کر دیا ہے۔

ایک بھارتی چینل کی پینل گفتگو میں بات کرتے ہوئے کرن جوہر نے کہا کہ وہ دیگر فلم میکرز پر بھی زور دیں گے کہ وہ مرد اداکاروں کے معاوضوں میں کمی کریں۔ انہوں نے یہ بھی بتایا کہ بالی ووڈ میں صرف 6 ہیروز ہیں، اور انہیں ہی زیادہ تر کاسٹ کیا جاتا ہے۔ وقت آگیا ہے کہ نئے اداکاروں کو بھی موقع دیا جائے۔

کرن جوہر نے مزید کہا کہ ان کی کم بجٹ کی نئی فلم ‘کل’ میں کام کرنے کے لیے بڑے اداکاروں نے انکار کر دیا، کیونکہ وہ اتنا معاوضہ مانگ رہے تھے جو پوری فلم کے بجٹ کے برابر تھا۔ انہوں نے بتایا کہ فلم کا بجٹ 40 کروڑ بھارتی روپے تھا، جبکہ مشہور اداکار اپنا معاوضہ بھی 40 کروڑ مانگ رہے تھے۔ انہوں نے ان سے سوال کیا کہ کیا وہ یہ گارنٹی دے سکتے ہیں کہ فلم ‘کل’ 120 کروڑ روپے کمائے گی؟

کرن جوہر نے یہ بھی کہا کہ نئے اداکار بھی بھاری معاوضہ مانگتے ہیں، جبکہ وہ فلم کے کردار کو سمجھنے یا رسک لینے پر تیار نہیں ہوتے۔

دوسری جانب، فلم میکر زویا اختر نے کہا کہ مرد اداکار یا ہیرو فلم کا 70 فیصد بجٹ اپنے معاوضے کی صورت میں لے جاتے ہیں، اور اس صورتحال کو بدلنے کی ضرورت ہے۔ انہوں نے مشورہ دیا کہ کرن جوہر اور دیگر فلم میکرز کو اداکاروں کے معاوضے کم کرکے تکنیکی عملے کے افراد کو دینا چاہیے۔