اسلام آباد:وزارت خارجہ نے پاکستانی شہریوں کو لبنان کا سفر نہ کرنے کی ہدایت کرتے ہوئے جاری ٹریول ایڈوائزری میں پہلے سے وہاں موجود پاکستانیوں کواپنی سرگرمیاں انتہائی محدود کرنے اور محفوظ مقامات پر منتقل ہونے کی تاکید کی ہے۔
دفترخارجہ کی ترجمان ممتاز زہرہ بلوچ کے دفتر سے ایڈوائزری جاری کی گئی۔ایڈوائزری میں کہا گیا کہ لبنان میں ہونے والے حالیہ حملوں کے پیش نظر پاکستانی شہریوں کو سختی سے تجویز دی جاتی ہے کہ وہ اگلے نوٹس تک لبنان کا سفر نہ کریں۔
ترجمان نے کہاکہ لبنان میں اس وقت موجود پاکستانیوں کو ہدایت کی گئی ہے کمرشل پروازوں کے ذریعے بیرون ملک کا سفر کریں جو اس وقت وہاں دستیاب ہیں۔
دفترخارجہ کے بیان میں کہا گیا کہ جو لوگ کسی وجہ سے لبنان نہیں چھوڑ سکتے انہیں تجویز دی جاتی ہے کہ انتہائی احتیاط کا مظاہرہ کریں اور محفوظ مقامات پر منتقل ہوجائیں۔
ترجمان کے مطابق لبنان میں موجود پاکستان سے اپیل کی گئی ہے وہ بیروت میں پاکستانی سفارت خانے سے بدستور رابطے میں رہیں۔
