اسلام آباد: قومی اسمبلی کے ارکان کی تنخواہوں ا ور مراعات کے حوالے سے اضافے کیلئے وزارت خزانہ اور حکومت کا اختیار ختم کردیا گیا۔
نجی ٹی وی کی رپورٹ میں وزارت خزانہ کے حوالے سے دعویٰ کیاگیا کہ ارکان کی تنخواہوں اور مراعات میں اضافے کے لیے قومی اسمبلی خود فیصلہ کرے گی
اس سے پہلے ارکان قومی اسمبلی کی تنخواہوں، مراعات میں اضافے کے لیے وزارت خزانہ سے مشاورت کی جاتی تھی تاہم اب ارکان اسمبلی کی تنخواہوں اور مراعات میں اضافے کیلئے وزارت خزانہ سے مشاورت نہیں کی جائے گی۔
سینیٹ کی قائمہ کمیٹی خزانہ کے چیئرمین سلیم مانڈوی والا کے مطابق ارکان قومی اسمبلی کے تمام الاؤنسز میں اضافے کا اختیار حکومت کے پاس نہیں ہو گا۔
سلیم مانڈوی والا نے ایکٹ میں ترمیم کی سفارش کرتے ہوئے کہاکہ سینیٹ ارکان کے لئے تنخواہوں اور مراعات میں اضافے کے لیے سینیٹ کو اختیارات دیے جائیں۔
وزارت خزانہ ترامیم کر کے ارکان قومی اسمبلی کیساتھ سینیٹر ز کو بھی شامل کرے، وزارت خزانہ حکام نے کہاہے کہ تنخواہوں اور مراعات میں اضافے کے لیے قومی اسمبلی اور سینیٹ کا اختیار ہے۔
خزانہ کمیٹی کےچیئرمین نے کہا کہ ارکان قومی اسمبلی کی تنخواہوں اور مراعات میں اضافے کا بل منظور ہو چکا ہے۔