اسلام آباد (نیوز ڈیسک) محکمۂ موسمیات نے ملک کے متعدد شہروں میں ڈینگی کی وباء پھیلنے کی وارننگ جاری کی ہے۔

محکمہ موسمیات کے مطابق، اگر درجہ حرارت 16 سے 26 ڈگری سینٹی گریڈ کے درمیان رہا تو ڈینگی پھیلنے کا خطرہ بڑھ سکتا ہے، خاص طور پر بارش کے نتیجے میں اکتوبر میں یہ خطرہ مزید بڑھ سکتا ہے۔

محکمہ نے بتایا کہ ڈینگی بڑے شہروں جیسے راولپنڈی اور اسلام آباد میں خطرناک حد تک پھیل سکتا ہے۔ اس کے علاوہ، لاہور، کراچی، حیدر آباد، فیصل آباد، ملتان، اور سیالکوٹ میں بھی ڈینگی کی وباء پھیلنے کی توقع ہے۔

محکمۂ موسمیات نے عوام سے اپیل کی ہے کہ وہ انسدادِ ڈینگی مہم میں انتظامیہ کے ساتھ تعاون کریں۔ حالیہ دنوں میں پنجاب میں ڈینگی کے کیسز میں اضافہ بھی دیکھنے میں آیا ہے۔