پاکستان نے ہائی بلڈ پریشر کے مریضوں کی مدد کے لیے اپنا ہیلتھ کیئر اے آئی چیٹ بوٹ لانچ کردیا ۔ اس چیٹ بوٹ کا نام ”ہارٹ لائن“ رکھا گیا جس کا اعلان پاکستان ہائی بلڈ پریشر لیگ (PHL) کی 27ویں سالانہ کانفرنس کے دوران کیا گیا۔
چیٹ بوٹ ”ڈسکورنگ ہائپر ٹینشن“ پروجیکٹ کا حصہ ہے  جسے ہائی بلڈ پریشر کے شکار 32.5 ملین پاکستانیوں کی مدد کے لیے ڈیزائن کیا گیا ، جو علاج کے بارے میں معلومات اور رہنمائی فراہم کرتا ہے۔
پاکستان میں صرف 11 فیصد لوگ ہائی بلڈ پریشر کومؤثر طریقے سے سنبھال پاتے ہیں۔طبی ماہرین نے صحت کے اس سنگین مسئلے کے حل کی صلاحیت کے لیے چیٹ بوٹ کی تعریف کی۔
نیشنل انسٹی ٹیوٹ آف کارڈیو ویسکولر ڈیزیز کے پروفیسر فواد فاروق نے مریضوں کے لیے اس کی ممکنہ قدر پر تبصرہ کرتے ہوئے کہا کہ یہ مصنوعی ذہانت پر مبنی چیٹ بوٹ پاکستان کی ہائی بلڈ پریشر والی آبادی کے لیےاہم پیشرفت ہے،یہ مریضوں کو ہائی بلڈ پریشر اور اسکے انتظام بارے معلومات تک فوری رسائی فراہم کرے گا، اور انہیں علم کے ساتھ بااختیار بنائے گا۔
انہوں نے کہا   نیا چیٹ بوٹ مریضوں اور ڈاکٹروں کی یکساں مدد کرے گا یہ لوگوں کو طرز زندگی کے انتخاب اور ادویات کے ذریعے بلڈ پریشر کے انتظام کے بارے میں تعلیم دے گا۔
ہائی بلڈ پریشر اور اسکے صحت پر اثرات  بارے  جاننے کے لیے کوئی بھی شخص واٹس ایپ پر ”ہارٹ لائن چیٹ بوٹ“ کو 7777996-0334 پر ٹیکسٹ کر سکتا ہے۔
منتظمین   چیٹ بوٹ کی صلاحیتوں کو بڑھانے کا ارادہ رکھتے ہیں جو صارفین کو ہائی بلڈ پریشر کے علاج اور انتظام کیلئے قریبی ماہرین اور کلینکس کے بارے میں بتا سکے گا۔