بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

شاہ رخ خان کی انجلینا جولی کیساتھ ایک پرانی ویڈیو انٹرنیٹ پر وائرل

اسلام آباد(شوبز ڈیسک)بالی ووڈ نگری کے بادشاہ شاہ رخ خان کی انجلینا جولی کے ساتھ ایک پرانی ویڈیو انٹرنیٹ پر ایک بار پھر وائرل ہوگئی ہے۔

شاہ رخ خان اپنی دلکش شخصیت سے لوگوں کو متاثر کرنے میں کبھی ناکام نہیں ہوتے، بالکل ایسا ہی سال 2000 میں لندن میں منعقد ہونے والی آئیفا ایوارڈز کی تقریب میں اس وقت ہوا جب وہ اسٹیج پر ’بہترین اداکارہ کا ایوارڈ پیش‘ کرنے کے لیے ہالی ووڈ کی معروف اداکارہ انجلینا جولی کے ساتھ آئے۔

انٹرنیٹ پر وائرل ہونے والی اس پرانی ویڈیو میں دیکھا جاسکتا ہے کہ شاہ رخ خان اسٹیج پر انجلینا جولی کے ساتھ آتے ہیں اور کہتے ہیں کہ’ایک بار پھرشام بخیر، یہ میرے لیے واقعی بہت اچھا لمحہ ہے کیونکہ میں انجلینا جولی کی صحبت میں ہوں۔‘

شاہ رخ خان کی یہ بات سن کر انجلینا جولی شرما جاتی ہیں۔

پھر شاہ رخ خان اداکارہ سے کہتے ہیں کہ وہ تقریب سے اپنے خیالات کا اظہار کرنا چاہیں تو کرسکتی ہیں۔

جس پر انجلینا جولی اپنے ہاتھ جوڑ کر کہتی ہیں کہ’ نمستے انڈیا والو، آپ سب کو یہاں دیکھ کر بہت خوشی ہوئی۔‘

اس گفتگو کے فوراََ بعد شاہ رخ خان بہترین اداکارہ کا ایوارڈ جیتنے والی اداکارہ کے نام کا اعلان کرتے ہیں۔

آئیفا ایوارڈ کی تقریب میں بہترین اداکارہ کا ایوارڈ اپنے نام کرنے والی اداکارہ ایشوریہ رائے اس وقت تقریب میں موجود نہیں ہوتیں، اس لیے ایوارڈ وصول کرنے کے لیے اسٹیج پر فلم ’ہم دل دے ہیں چکے صنم‘ کے ہدایتکار سنجے لیلہ بھنسالی آتے ہیں۔

شاہ رخ خان، سنجے لیلہ بھنسالی کے اسٹیج پر پہنچنے پر مذاق میں کہتے ہیں کہ’ہمیں یہاں اس بات کو لازمی یقینی بنانا ہوگا کہ انجلینا کو معلوم ہو کہ یہ ایشوریہ رائے نہیں ہیں۔‘

جس پر انجلینا جولی اپنی ہنسی پر قابو نہیں رکھ پاتیں اور زور سے ہنستی ہیں۔