لاہور(نیوز ڈیسک) وزیراعلیٰ پنجاب مریم نواز شریف نے اینٹی سموگ پلان کے تحت پنجاب بھر میں سرکاری اور نجی تمام گاڑیوں کی فٹنس سرٹیفکیٹ حاصل کرنا لازمی قرار دے دیا۔ اس اقدام کا مقصد سموگ کی روک تھام اور ماحولیاتی آلودگی کو کم کرنا ہے۔

پنجاب حکومت کی جانب سے جاری نوٹیفکیشن کے مطابق، تمام چھوٹی اور بڑی گاڑیوں کو فٹنس سرٹیفکیٹ اتھارٹی سے تصدیق نامہ حاصل کرنا ہوگا۔ اس سلسلے میں تمام صوبائی وزارتوں کے سیکرٹریوں اور پنجاب کے تمام کمشنرز کو حکم نامے بھیج دیے گئے ہیں۔

نوٹیفکیشن میں ہدایت کی گئی ہے کہ تمام وزارتوں اور ان کے ذیلی محکموں کے زیر استعمال گاڑیوں کا معائنہ کرایا جائے اور 30 جنوری تک فٹنس سرٹیفکیٹ حاصل کیے جائیں۔

وزیراعلیٰ نے اس بات پر زور دیا کہ گاڑیوں سے نکلنے والا دھواں سموگ کی ایک بڑی وجہ ہے، جو ماحول اور انسانی صحت پر منفی اثر ڈال رہا ہے۔ انہوں نے کہا کہ بڑھتی ہوئی گاڑیوں کی تعداد کو ماحول دوست طریقے سے منظم کرنا ضروری ہے تاکہ عوام کو صاف اور صحت مند ماحول فراہم کیا جا سکے۔

پنجاب حکومت کا یہ اقدام ماحولیاتی تحفظ کے لیے ایک اہم سنگ میل ثابت ہوگا۔