ریاض(نیوز ڈیسک) وزیراعظم محمد شہباز شریف اپنا دو روزہ دورۂ سعودی عرب مکمل کرکے وطن واپس روانہ ہوگئے۔ دورے کے دوران انہوں نے ریاض میں منعقدہ ون-واٹر سربراہی اجلاس میں شرکت کی، جہاں انہوں نے پانی کی قلت سے نمٹنے کے لیے چھ نکاتی ایجنڈا پیش کیا اور پاکستان جیسے ترقی پذیر ممالک کو ماحولیاتی تبدیلی کے چیلنجز سے درپیش مسائل پر روشنی ڈالی۔
وزیراعظم نے سعودی ولی عہد و وزیراعظم شہزادہ محمد بن سلمان سے اہم ملاقات کی۔ دونوں رہنماؤں نے پاک-سعودیہ تعلقات کو مزید مضبوط کرنے اور ان میں بڑی تبدیلی لانے کے عزم کا اعادہ کیا۔ ملاقات میں پاکستان میں سعودی سرمایہ کاری سے متعلق مفاہمتی یادداشتوں اور معاہدوں پر عملدرآمد کی رفتار پر اطمینان کا اظہار کیا گیا۔
وزیراعظم نے فرانس کے صدر ایمانویل میکرون سے بھی ملاقات کی، جس میں زراعت، لائیو سٹاک، انفارمیشن ٹیکنالوجی، پیشہ ورانہ تربیت اور پینے کے صاف پانی کے شعبوں میں بزنس ٹو بزنس روابط کے ذریعے تعاون بڑھانے پر اتفاق کیا گیا۔
دورۂ سعودی عرب کو عالمی اور دو طرفہ تعاون کے فروغ کے لیے اہم قدم قرار دیا جا رہا ہے، جس سے پاکستان کے ترقیاتی منصوبوں میں مثبت پیش رفت کی امید ہے۔
