اسلام آباد (نیوز ڈیسک) وزیراعظم محمد شہباز شریف نے شام کی موجودہ صورتحال کے پیشِ نظر پاکستانی شہریوں کے انخلاء کے لیے فوری اور مؤثر اقدامات کی ہدایت کی ہے۔ اجلاس میں وزیراعظم نے زور دیا کہ شام سے وطن واپسی کے خواہاں پاکستانیوں کے محفوظ انخلاء کے لیے ہمسایہ ممالک کے ذریعے جلد از جلد لائحہ عمل تشکیل دیا جائے۔

وزیراعظم نے واضح کیا کہ شام میں مقیم پاکستانیوں کے جان و مال کی حفاظت حکومت کی اولین ترجیح ہے، اور اس مقصد کے لیے تمام وسائل بروئے کار لائے جائیں۔ انہوں نے دمشق میں پاکستانی سفارت خانے کو معلوماتی ڈیسک اور ہیلپ لائن قائم کرنے کا حکم دیا تاکہ متاثرہ شہریوں سے بروقت رابطہ ممکن ہو۔ مزید ہدایت کی گئی کہ دفتر خارجہ کا کرائسس مینجمنٹ یونٹ اور شام کے ہمسایہ ممالک میں پاکستانی سفارت خانے امن و امان کی صورتحال بہتر ہونے تک 24 گھنٹے فعال رہیں۔

اجلاس میں نائب وزیراعظم اسحاق ڈار، وزیر دفاع خواجہ آصف، وزیر اقتصادی امور احد چیمہ، وزیر اطلاعات عطا اللہ تارڑ، معاون خصوصی طارق فاطمی اور دیگر اعلیٰ حکام نے شرکت کی۔ وزیراعظم نے تاکید کی کہ انخلاء کے عمل کو تیزی اور مؤثر طریقے سے مکمل کیا جائے تاکہ شہریوں کی حفاظت یقینی بنائی جا سکے۔