لاہور(نیوز ڈیسک)وزیر اعلیٰ پنجاب مریم نواز شریف کے اعزاز میں بیجنگ میں کیمونسٹ پارٹی آف چائنہ کے انٹرنیشنل ڈیپارٹمنٹ حکام کی جانب سے خصوصی ظہرانہ دیا گیا۔ وفد کا پرتپاک خیر مقدم کیا گیا، اور وزیر اعلیٰ کی کیمونسٹ پارٹی کی نائب وزیر سن ہائی ین سمیت دیگر حکام سے اہم ملاقات ہوئی۔
ملاقات میں دونوں فریقوں نے مختلف شعبوں میں دوطرفہ تعلقات کو مزید مضبوط بنانے کے عزم کا اعادہ کیا اور جامع شراکت داری کو وسعت دینے کی ضرورت پر زور دیا۔ وزیر اعلیٰ مریم نواز شریف نے پاک چین تعلقات کے فروغ کے لیے جڑواں شہروں اور صوبوں کے تصور کی تجویز دی اور پنجاب میں چینی سرمایہ کاری کے لیے بھرپور تعاون کی پیشکش کی۔
وزیر اعلیٰ نے موسمیاتی تبدیلی، ویسٹ مینجمنٹ، زراعت، اور یوتھ ڈویلپمنٹ کے شعبوں میں چین کے تعاون کا خیر مقدم کیا۔ انہوں نے کہا کہ پاکستان اور چین کی دیرینہ دوستی کو خصوصی اہمیت حاصل ہے اور کیمونسٹ پارٹی آف چائنہ کا دو طرفہ تعلقات کے استحکام میں کردار قابلِ قدر ہے۔
