اسلام آباد (نیوز ڈیسک)وفاقی وزیر توانائی سردار اویس احمد خان لغاری نے انرجی کنزرویشن بلڈنگ کوڈ 2023 کے نفاذ پر زور دیتے ہوئے تمام وزرائے اعلیٰ، وزیراعظم آزاد کشمیر اور وفاقی وزراء کو مراسلات ارسال کر دیے ہیں۔ اپنے ویڈیو پیغام میں انہوں نے صوبائی حکومتوں سے قوانین کے فوری نفاذ کی اپیل کی ہے۔

وفاقی وزیر نے کہا کہ عمارات میں توانائی کے غیر مؤثر استعمال سے نہ صرف بلوں میں اضافہ ہوتا ہے بلکہ گرمیوں میں بجلی کی طلب بھی بے حد بڑھ جاتی ہے، جو 29 ہزار میگاواٹ تک پہنچ سکتی ہے۔ چند گھنٹوں کی لوڈشیڈنگ سے بچنے کے لیے مہنگے پاور پلانٹس چلانے پڑتے ہیں، جس سے بجلی کی قیمتوں میں اضافی بوجھ پڑتا ہے۔

انہوں نے کہا کہ انرجی کنزرویشن بلڈنگ کوڈز کے نفاذ سے توانائی کی بچت اور پیک ڈیمانڈ مینجمنٹ میں بہتری آئے گی، جس سے نہ صرف عوام کو ریلیف ملے گا بلکہ توانائی کے وسائل کو مؤثر انداز میں استعمال کرنے میں مدد ملے گی۔

اویس لغاری نے تمام صوبائی حکومتوں سے درخواست کی کہ وہ اس اہم معاملے میں تعاون کریں اور مقامی اداروں کو قوانین کا پابند بنائیں تاکہ توانائی کے تحفظ کو یقینی بنایا جا سکے۔

وفاقی وزیر نے مزید کہا کہ یہ قوانین ملکی اور توانائی کے شعبے کی دیرپا ترقی کے لیے ایک اہم سنگ میل ہیں، اور تمام متعلقہ اداروں کو اس پر فوری عملدرآمد یقینی بنانا ہوگا۔