اسلام آباد (نیوز ڈیسک)وفاقی وزیر برائے امور کشمیر و گلگت بلتستان اور صدر مسلم لیگ (ن) خیبرپختونخوا، انجینئر امیر مقام کی زیر صدارت بحریہ ٹاؤن اسلام آباد میں ایک پروقار تقریب منعقد ہوئی، جس میں ٹی ایل پی کے سابق امیدوار NA-30 پیر ظاہر شاہ نے اپنے خاندان اور ساتھیوں سمیت مسلم لیگ (ن) میں باضابطہ شمولیت اختیار کی۔
تقریب کے دوران انجینئر امیر مقام نے نئے شامل ہونے والوں کو پارٹی کی روایتی کیپ پہنائی اور ان کا خیرمقدم کرتے ہوئے کہا کہ پیر ظاہر شاہ اور ان کے ساتھیوں کی شمولیت نہ صرف مسلم لیگ (ن) کی بڑھتی ہوئی عوامی مقبولیت کا اعتراف ہے بلکہ قائد محمد نواز شریف اور وزیراعظم شہباز شریف کی شاندار کارکردگی پر عوامی اعتماد کا مظہر بھی ہے۔ انہوں نے کہا کہ مسلم لیگ (ن) عوامی خدمت، ملکی ترقی، اور فلاح و بہبود کے مشن پر کاربند ہے، اور خیبرپختونخوا میں پارٹی کی مضبوطی کے لیے یہ شمولیت ایک اہم قدم ہے۔
انجینئر امیر مقام نے مزید کہا کہ پارٹی کو مضبوط کرنا اور عوامی خدمت کے جذبے کو فروغ دینا مسلم لیگ (ن) کی اولین ترجیح ہے۔ نئے شامل ہونے والے افراد کا جذبہ اور اخلاص پارٹی کے لیے ایک قیمتی اثاثہ ثابت ہوگا، اور ان کی شمولیت سے عوامی مسائل کے حل کے لیے مشترکہ کوششوں کو تقویت ملے گی۔
تقریب میں مسلم لیگ (ن) پشاور کے صدر راشد محمود خان، سیکرٹری جنرل امان اللہ خان، سیکرٹری اطلاعات اعجاز خان بڈھ بیر، نائب صدر ملک راشد حسین، سینیٹر اکرام اللہ خان، اور حقداد خان نے شرکت کی۔ پارٹی رہنماؤں نے پیر ظاہر شاہ اور ان کے ساتھیوں کا پرتپاک استقبال کیا اور کہا کہ ان کی شمولیت سے پارٹی کی بنیاد مزید مستحکم ہوگی اور عوامی خدمت کے مشن کو نئی قوت ملے گی۔