راولپنڈی : سکیورٹی فورسز نے 30 اور 31 جنوری کو خیبر پختونخوا میں مختلف آپریشنز کے دوران 10 دہشت گردوں کو ہلاک کر دیا۔
آئی ایس پی آر کے مطابق دہشت گردوں کی موجودگی کی اطلاعات پر ڈیرہ اسماعیل خان کے علاقے کھلاچی میں انٹیلی جنس کی بنیادوں پر آپریشن کیا گیا، سیکیورٹی فورسز نے دہشت گردوں کے ٹھکانے کو نشانہ بنایا، اس دوران فائرنگ کے نتیجے میں چار دہشت گرد ہلاک ہوگئے۔
اسی دوران شمالی وزیرستان کے مختلف علاقوں، دتہ خیل، حسن خیل، غلام خان اور میر علی میں 4 مختلف جھڑپیں ہوئیں، ان میں سیکیورٹی فورسز نے 6 مزید دہشت گردوں کو ہلاک کردیا۔
تمام ہلاک دہشت گردوں کے قبضے سے اسلحہ اور گولہ بارود بھی برآمد کیا گیا۔
آئی ایس پی آر کے مطابق یہ دہشت گرد سیکیورٹی فورسز اور عام شہریوں کے خلاف مختلف دہشت گرد کارروائیوں میں ملوث تھے، علاقے میں کسی بھی باقی ماندہ دہشت گرد کے خاتمے کے لیے کلیئرنس آپریشن جاری ہے، پاک فوج ملک سے دہشت گردی کے ناسور کے مکمل خاتمے کے لیے پُرعزم ہے۔
ادھرصدرآصف علی زرداری اور وزیراعظم محمد شہباز شریف نے ڈیرہ اسماعیل خان اور ضلع وزیرستان میں فتنتہ الخوارج کے دہشت گردوں کے خلاف مختلف کامیاب کاروائی پر سکیورٹی فورسز کی ستائش کی۔انہوں نے کہاکہ ان آپریشنز میں 10 خوارجی دہشت گردوں کو ہلاک کرنے پر سکیورٹی فورسز کو خراج تحسین پوری قوم دہشت گردوں کے خلاف جنگ میں سکیورٹی فورسز کے ساتھ کھڑی ہے۔
انہوں نے کہاکہ ملک سے ہر قسم کی دہشت گردی کے خاتمے کے لئے پر عزم ہیں۔
خیبرپختونخوا: سکیورٹی فورسز کی کارروائیاں، 10 دہشتگرد ہلاک
