بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

صدر مملکت آصف علی زرداری کی بیجنگ میں چیئرمین نیشنل پیپلز کانگریس چاؤ لے چی سے ملاقات

بیجنگ (نیوز ڈیسک) صدر مملکت آصف علی زرداری نے بیجنگ میں چین کی نیشنل پیپلز کانگریس کی قائمہ کمیٹی کے چیئرمین چاؤ لے چی سے ملاقات کی، جس میں دونوں ممالک کے درمیان سدا بہار دوستی کو اجاگر کیا گیا۔

سرکاری اعلامیے کے مطابق، صدر مملکت اور چیئرمین چاؤ لے چی نے پاک چین تعلقات کی دہائیوں پر محیط گہری اور وسیع دوستی پر اطمینان کا اظہار کیا۔ دونوں رہنماؤں نے اسٹریٹجک باہمی اعتماد کو پاک چین دوستی کی بنیاد قرار دیا اور عملی تعاون کو مزید مستحکم کرنے پر زور دیا۔

ملاقات میں پاک چین اقتصادی راہداری (سی پیک) فیز 2.0 کی اعلیٰ معیار کی ترقی پر تبادلہ خیال کیا گیا، جبکہ سائنس و ٹیکنالوجی، قابل تجدید توانائی، بنیادی ڈھانچے اور زرعی شعبے میں تعاون کے فروغ کی ضرورت پر بھی زور دیا گیا۔

فریقین نے پارلیمانی تبادلوں اور سی پیک کے سیاسی جماعتوں کے مشترکہ مشاورتی میکانزم میں شرکت سمیت ادارہ جاتی روابط کو مضبوط بنانے کے مواقع پر تبادلہ خیال کیا۔

اعلامیے کے مطابق، سی پیک عوامی خوشحالی پر مرکوز ترقی کی روشن مثال ہے اور دونوں ممالک اس تعاون کو مزید مستحکم کرنے کے لیے پُرعزم ہیں۔