انٹرنیشنل کرکٹ کونسل (آئی سی سی) چیمپئینز ٹرافی میں بنگلا دیش کرکٹ ٹیم کے کپتان نجم الحسین شنتو چیمپئنز ٹرافی میں حیران کرنے کے لیے پُرامید ہیں۔

چیمپئنز ٹرافی میں شرکت کے لیے دبئی روانگی سے قبل میڈیا سے گفتگو کرتے ہوئے انہوں نے کہا کہ ہم چیمپئن بننے کے لیے چیمپئز ٹرافی میں شرکت کر رہے ہیں۔

نجم الحسین شنتو کا کہنا ہے کہ اس ٹورنامنٹ میں تمام 8 ٹیمیں چیمپئن بننے کا حق رکھتی ہیں، میرا یقین ہے کہ ہماری ٹیم میں چیمپئن بننے کی صلاحیت ہے، کسی پر دباؤ نہیں۔

بنگلا دیش کرکٹ ٹیم کے کپتان نے یہ بھی کہا کہ ہر کھلاڑی چیمپئن بننا چاہتا ہے، انہیں اپنی صلاحیتیوں پر یقین ہے، ہمیں نہیں پتہ اللّٰہ نے ہماری قسمت میں کیا لکھا ہے لیکن ہم محنت کر رہے ہیں۔

واضح رہے کہ بنگلا دیش کرکٹ ٹیم پاکستان، بھارت اور نیوزی لینڈ کے ساتھ گروپ اے میں شامل ہے۔

بنگلا دیش ٹیم پہلا میچ 20 فروری کو بھارت کے خلاف دبئی میں کھیلے گی۔

بنگلا دیش ٹیم 24 فروری کو نیوزی لینڈ اور 27 فروری کو پاکستان کے خلاف میچ کھیلے گی۔