قائد حزب اختلاف شہباز شریف نے کہا ہے کہ حکومت نے عوام کو سبزباغ دکھا کر ملک کو تباہی کے دہانے پر پہنچادیا ہے۔

میڈیا سے بات چیت کرتے ہوئے شہباز شریف نے کہا کہ سیاسی جماعتوں سے بات کرنا ہمارا سیاسی حق ہے اور سیاست میں کوئی چیز حتمی نہیں ہوتی ہے۔

انہوں نے کہا کہ سلیکٹڈ حکومت کو آئینی طریقے سے ہٹا کر قوم کے پاس جائیں گے کیونکہ ہم عوامی حکومت کے خواہاں ہیں۔

ان کا کہنا تھا کہ کرپٹ ترین حکومت نے عوام کا جینا مشکل کردیا ہے اور تحریک عدم اعتماد فرد واحد کی نہیں بلکہ 22 کروڑ عوام کی خواہش ہے۔

دوسری جانب سے سراج الحق نے حکومت کے لئے اپنے خیالات کا اظہار کرتے ہوئے کہا ہے کہ ا میں کوئی دورائے نہیں کہ موجودہ حکومت پوری طرح ناکام ہوچکی ہے۔

انہوں نے کہا کہ حکومت نے عوام کا جینا مشکل بنادیا ہے جس کے لئے عدم اعتماد جمہوری اور آئینی طریقہ کار ہے۔

ان کا کہنا تھا کہ افراد کی تبدیلی نہیں بلکہ نظام کی تبدیلی مسئلے کا حل ہے اور اس معاملے پر پارٹی سے مشاورت کے بعد عدم اعتماد پر اپنا مؤقف پیش کریں گے۔

انہوں نے کہا کہ ملک کے اصل حکمران 22 کروڑ عوام ہیں جبکہ حکومت نے کھانے کے نوالے، پانی کے قطرے پر  بھی ٹیکس لگادیا ہے۔

خیال رہے کہ اس سے قبل اپوزیشن لیڈر شہباز شریف اور امیر جماعت اسلامی سراج الحق کی ملاقات ہوئی تھی۔

ملاقات مکے دوران ن لیگ نے تحریک عدم اعتماد کے لیے سراج الحق سے تعاون مانگا جبکہ مجموعی سیاسی صورتحال پر بھی تبادلہ خیال کیا گیا ہے۔

اس ملاقات میں ن لیگ کی جانب سے سعد رفیق اور مریم اورنگزیب جبکہ سراج الحق کے ساتھ لیاقت بلوچ اور میاں اسلم موجود تھے۔