نیو انگلینڈ(نیوز ڈیسک) معروف پاپ گلوکارہ ٹیلر سوئفٹ کے ساحل کے نزدیک واقع پُرتعیش گھر کے قریب انسانی جسم کی باقیات کی دریافت نے علاقے میں خوف و ہراس پھیلا دیا۔
غیرملکی میڈیا رپورٹس کے مطابق نیو انگلینڈ کے مختلف علاقوں میں حالیہ مہینوں میں لاشیں ملنے کے بڑھتے واقعات کے بعد علاقے میں کسی سیریل کلر کی ممکنہ موجودگی کی افواہیں زور پکڑ گئی ہیں۔
حالیہ واقعہ واچ ہل کے ایورٹ ایوینیو پر پیش آیا، جو ایک پرتعیش ساحلی علاقہ ہے اور جہاں ٹیلر سوئفٹ کی عالی شان رہائش گاہ بھی واقع ہے۔
پولیس کو یہاں ساحل پر ایک انسانی ٹانگ کی ہڈی ملی جو ٹیلر سوئفٹ کے گھر سے محض نصف میل کی دوری پر موجود تھی۔
حکام نے فی الحال کسی مجرمانہ سرگرمی کے شواہد کی تردید کی ہے، تاہم مقامی آبادی میں شدید بے چینی پائی جاتی ہے۔
ایک مقامی رہائشی نے بتایا کہ’یہ جگہ ٹیلر سوئفٹ کے گھر اور اوشین ہاؤس سے صرف چند کلومیٹر کے فاصلے پر ہے، میں نے کبھی سوچا بھی نہیں تھا کہ یہاں ایسا کچھ ہو سکتا ہے، خاص طور پر واچ ہل جیسے محفوظ اور مہنگے علاقے میں‘۔
ٹیلر سوئفٹ یا انکی ٹیم کی جانب سے تاحال اس واقعے پر کوئی تبصرہ نہیں کیا گیا ہے۔
