اسلام آباد(نیوز ڈیسک) صدرِ مملکت آصف علی زرداری نے مستونگ، بلوچستان میں پولیس وین پر ہونے والے دہشت گرد حملے کی شدید الفاظ میں مذمت کرتے ہوئے اسے ایک بزدلانہ اور قابلِ افسوس واقعہ قرار دیا ہے۔
صدرِ مملکت نے حملے میں شہید ہونے والے پولیس اہلکاروں کو خراجِ عقیدت پیش کیا اور ان کے اہلِ خانہ سے دلی ہمدردی و تعزیت کا اظہار کیا۔ اپنے بیان میں انہوں نے کہا کہ قوم اپنے ان بہادر سپاہیوں کی قربانیوں کو کبھی فراموش نہیں کرے گی، جنہوں نے امن و امان کی خاطر اپنی جانوں کا نذرانہ پیش کیا۔
آصف علی زرداری نے واضح کیا کہ پاکستان دہشت گردی کے مکمل خاتمے تک اپنی جدوجہد جاری رکھے گا اور ایسے بزدلانہ حملے قوم کے حوصلے پست نہیں کر سکتے۔ انہوں نے کہا کہ ریاست دہشت گردوں اور ان کے سہولت کاروں کو ہر صورت کیفرِ کردار تک پہنچا کر دم لے گی۔
صدرِ مملکت نے حملے میں زخمی ہونے والے پولیس اہلکاروں کی جلد صحتیابی کے لیے نیک تمناؤں اور دعاؤں کا بھی اظہار کیا۔ ان کا کہنا تھا کہ پوری قوم ان زخمی اہلکاروں کی بہادری کو سلام پیش کرتی ہے۔
یہ بیان اس وقت سامنے آیا ہے جب بلوچستان میں ایک بار پھر دہشت گرد عناصر نے امن و امان کو چیلنج کرنے کی کوشش کی، جسے ملک کی اعلیٰ قیادت نے بھرپور انداز میں مسترد کرتے ہوئے قومی اتحاد اور سیکیورٹی اداروں کے ساتھ مکمل یکجہتی کا اعادہ کیا ہے۔
