محکمہ موسمیات نے وفاقی دارالحکومت اسلام آباد اور راولپنڈی میں مزید بارشوں کی پیشگوئی کر دی ہے، جس کے پیش نظر راول ڈیم میں پانی کا دباؤ کم کرنے کے لیے انتظامیہ نے راول ڈیم کے اسپیل ویز کھول دیے ہیں۔

انتظامیہ کے مطابق راول ڈیم میں پانی کی سطح 1748.40 فٹ تک پہنچ چکی ہے، جبکہ حفاظتی اقدامات کے تحت سطح کو 1746 فٹ پر لایا جائے گا۔ ڈیم میں پانی ذخیرہ کرنے کی گنجائش 1752 فٹ تک ہے، جس کے پیش نظر اسپیل ویز کھولنے کا فیصلہ کیا گیا۔

ترجمان کے مطابق اسپیل ویز کھولنے سے قبل حفاظتی سائرن بجائے گئے تاکہ آس پاس کے رہائشی علاقوں کے شہریوں کو بروقت خبردار کیا جا سکے۔

انتظامیہ نے شہریوں کو ہدایت کی ہے کہ وہ ندی نالوں اور ڈیم کے آس پاس غیر ضروری نقل و حرکت سے گریز کریں اور احتیاطی تدابیر پر عمل کریں۔

محکمہ موسمیات نے آئندہ چوبیس گھنٹوں کے دوران مزید بارش کی پیشگوئی کرتے ہوئے متعلقہ اداروں کو الرٹ رہنے کی ہدایت جاری کی ہے۔ بارشوں کے باعث نشیبی علاقوں میں اربن فلڈنگ کا خطرہ بھی ظاہر کیا جا رہا ہے۔

سیکریٹری ایمرجنسی سروسز پنجاب رضوان نصیر نے بارشوں سے متعلق ایک تشویشناک انکشاف کرتے ہوئے بتایا کہ حالیہ موسم میں پنجاب بھر میں 119 افراد بارشوں کے باعث جاں بحق ہو چکے ہیں۔