چین کے جنوبی صوبے گوانگ ڈونگ میں چکن گونیا کے کیسز تیزی سے بڑھ رہے ہیں۔ مقامی حکام کے مطابق صرف ایک ماہ میں 8 ہزار سے زیادہ افراد اس وائرس کا شکار ہوچکے ہیں۔ اس وبا کو پھیلنے سے روکنے کے لیے حکام نے فوری اقدامات شروع کر دیے ہیں۔
متاثرہ علاقوں میں مچھر مارنے کے لیے ڈرونز کے ذریعے اسپرے کیا جا رہا ہے اور کھلے مقامات سے ایسے برتنوں کو ہٹانے کی ہدایت کی گئی ہے جن میں پانی جمع ہو کر مچھروں کی افزائش کا سبب بن سکتے ہیں۔ اگر کوئی شخص پانی جمع کرنے والے برتن کو نہیں ہٹاتا، تو اُسے 10,000 یوآن (تقریباً 1,400 امریکی ڈالر) تک جرمانہ کیا جا رہا ہے۔ عوام کو مچھروں سے بچاؤ کے طریقوں پر عمل کرنے اور مشتبہ علامات ظاہر ہونے پر فوراً طبی مدد حاصل کرنے کی ہدایت دی گئی ہے۔
ماہرین کا کہنا ہے کہ غیر معمولی بارشیں اور بلند درجہ حرارت نے چکن گونیا کے پھیلاؤ کو مزید بڑھا دیا ہے۔ اگرچہ زیادہ تر مریض ایک ہفتے میں صحت یاب ہو جاتے ہیں اور بیماری کی شدت کم ہوتی ہے، لیکن اس کا تیزی سے پھیلنا تشویش کا باعث ہے۔ ہانگ کانگ میں بھی ایک 12 سالہ بچے میں اس وائرس کی تشخیص ہوئی ہے، جو فوشان سے واپس آیا تھا۔
چکن گونیا ایک ایسی بیماری ہے جو اکثر کراچی جیسے شہروں میں لوگوں کو جوڑوں کے شدید درد میں مبتلا کر دیتی ہے۔ اس کا کوئی مخصوص علاج موجود نہیں ہے، لیکن احتیاطی تدابیر اور صحت مند غذا سے اس کی تکالیف میں کمی کی جا سکتی ہے۔
یہ وائرس ایشیا، افریقہ اور جنوبی امریکا میں پھیلتا ہے، لیکن چین میں اس کی شدت کا یہ منظر پہلی بار دیکھنے کو ملا ہے۔ اس وقت اس کی کوئی ویکسین دستیاب نہیں ہے۔
