وزیرِ اعظم کا سیلابی صورتحال پر ہنگامی اجلاس،خیبر پختونخوا کو فوری امداد کی ہدایت
اسلام آباد: وزیرِ اعظم محمد شہباز شریف کی زیر صدارت ملک میں حالیہ شدید بارشوں اور سیلابی صورتحال کا جائزہ لینے کے لئے ہنگامی اجلاس ہوا، جس میں بالائی علاقوں میں کلاؤڈ برسٹ اور فلیش فلڈز سے ہونے والے نقصانات اور جاری ریسکیو و ریلیف آپریشن پر تفصیلی بریفنگ دی گئی۔
این ڈی ایم اے کی تفصیلی بریفنگ
اجلاس میں چیئرمین نیشنل ڈیزاسٹر مینجمنٹ اتھارٹی لیفٹیننٹ جنرل انعام حیدر ملک نے وزیرِ اعظم کو ملک کے مختلف متاثرہ علاقوں، خصوصاً خیبر پختونخوا کے اضلاع میں جانی و مالی نقصانات اور ریسکیو کارروائیوں پر بریفنگ دی۔
فوری اقدامات کی ہدایات
وزیرِ اعظم نے این ڈی ایم اے کو ہدایت کی کہ خیبر پختونخوا حکومت اور پی ڈی ایم اے کے ساتھ مکمل تعاون جاری رکھا جائے۔
امدادی سامان بشمول خیمے، ادویات، خوراک اور دیگر ضروری اشیاء فوری طور پر متاثرہ علاقوں کو بھجوایا جائے۔
امداد ترجیحی بنیادوں پر ٹرکوں کے ذریعے فوری پہنچائی جائے تاکہ تاخیر نہ ہو۔
پھنسے ہوئے مقامی افراد اور سیاحوں کو فوری طور پر محفوظ مقامات پر منتقل کیا جائے۔
صوبائی قیادت سے رابطے
وزیرِ اعظم شہباز شریف نے گورنر خیبر پختونخوا فیصل کریم کنڈی اور وزیرِ اعلیٰ خیبر پختونخوا علی امین گنڈا پور سے بھی ٹیلیفون پر رابطہ کیا۔ دونوں رہنماؤں سے گفتگو میں وزیرِ اعظم نے قیمتی انسانی جانوں کے ضیاع پر گہرے دکھ اور افسوس کا اظہار کیا اور مکمل تعاون کی یقین دہانی کرائی۔
انہوں نے واضح کیا کہ این ڈی ایم اے کو صوبائی حکومت کے ساتھ رابطے مزید مؤثر بنانے کی ہدایت دی گئی ہے تاکہ متاثرہ علاقوں میں ریلیف کاموں میں کوئی خلل نہ آئے۔
قوم متاثرین کے ساتھ کھڑی ہے
وزیرِ اعظم شہباز شریف نے کہاکہ مشکل کی اس گھڑی میں ہم متاثرہ خاندانوں کے ساتھ کھڑے ہیں۔ ہماری دعائیں، ہمدردیاں اور وسائل سب ان کے لئے وقف ہیں۔