یلیفورنیا کی ریاستی سینیٹ نے ایک تاریخی قدم اٹھاتے ہوئے ایک ایسی قرارداد متفقہ طور پر منظور کرلی جس میں پاکستان اور امریکا کے درمیان دیرینہ تعلقات اورکیلیفورنیا کی معیشت، سماج اور ثقافت میں پاکستانی نژاد امریکیوں کے کردار کو بھرپور خراجِ تحسین پیش کیا گیا ہے۔
پاکستانی رنگوں میں سجی سینیٹ
یہ قرارداد سینیٹر میلیسا ہرٹاڈونے پیش کی، جو سینیٹ کی سب سے کم عمر خاتون رکن اور کمیٹی برائے زراعت کی چیئرپرسن ہیں۔ اس موقع پر سینیٹر ہرٹاڈو نے روایتی پاکستانی لباس زیب تن کیا اور مہندی لگا کر  ایوان میں آئیں—یہ انداز پاکستانی ثقافت سے ان کی محبت اور احترام کی جھلک تھا۔
قرارداد کا مقصد اور پیغام
قرارداد میں پاکستان اور امریکا کے درمیان مضبوط، کثیر الجہتی تعلقات کا اعتراف کیا گیا۔
کیلیفورنیا کی ترقی میں پاکستانی نژاد امریکیوں کی معاشی، سماجی اور ثقافتی خدمات کو سراہا گیا۔
پاکستانی امریکن نوجوانوں کی اپنی ثقافت سے جڑے رہنے کی کوششوں کو اجاگر کیا گیا۔
ان شخصیات اور تنظیموں کا اعتراف کیا گیا جنہوں نے پاکستانی ثقافت، اقدار اور کامیابیوں کو امریکا میں فروغ دیا۔
پاک امریکا تعلقات: وقار، استقامت اور مشترکہ اقدار
سینیٹر میلیسا ہرٹاڈو نے اپنے ریمارکس میں کہا کہ پاکستانی کمیونٹی کی کہانی قربانی، وقار اور استقامت کی داستان ہے۔ امریکا اور پاکستان کی شراکت داری جمہوریت، انسانی وقار اور باہمی احترام پر قائم ہے۔
انہوں نے پاکستانی سفیر رضوان سعید شیخ کی سینیٹ میں موجودگی کا خیر مقدم کیا اور پاک-امریکا تعلقات کو مضبوط بنانے میں ان کی خدمات کو سراہا۔
سفیر پاکستان کا ردعمل
سفیر پاکستان نے قرارداد کی منظوری کو “پاک-امریکا عوامی دوستی اور مضبوط تعلقات کا عملی مظہر قرار دیا۔ ان کا کہنا تھاکہ کیلیفورنیا سینیٹ کی جانب سے پاکستان کے 79ویں یومِ آزادی پر اس قرارداد کی منظوری اس بات کا ثبوت ہے کہ ہمارے تعلقات صرف حکومتوں تک محدود نہیں بلکہ عوامی سطح پر بھی گہرے اور پائیدار ہیں۔

انہوں نے سینیٹر میلیسا ہرٹاڈو اور کونسل آف پاکستا ن کی کاوشوں کا شکریہ ادا کرتے ہوئے دونوں ملکوں کے عوام کو مزید قریب لانے کے عزم کا اظہار کیا۔
کیلیفورنیا: ایک عالمی مرکز
واضح رہے کہ کیلیفورنیا ، جسے “گولڈن اسٹیٹ” کے نام سے جانا جاتا ہے، نہ صرف ایک عالمی اقتصادی طاقت ہے بلکہ ثقافتی تنوع کا بھی مرکز بن چکا ہے، جہاں پاکستانی نژاد امریکی برادری ایک متحرک اور مثبت کردار ادا کر رہی ہے۔