گلگت (نیوز ڈیسک) گلگت بلتستان کے ضلع غذر کے علاقے تالی داس میں گلیشیئر پھٹنے سے پیدا ہونے والی سیلابی صورتحال کے بعد مکینوں کو خیمہ بستی میں منتقل کر دیا گیا ہے۔ صوبائی حکومت نے متاثرین کے لیے مستقل متبادل گاؤں بنانے کا اعلان کرتے ہوئے وفاقی حکومت سے بھرپور تعاون کی اپیل کر دی۔
صوبائی حکومت کے ترجمان کے مطابق وزیراعلیٰ گلگت بلتستان نے متاثرہ علاقے کا دورہ کیا، متاثرین سے ملاقات کی اور امدادی کارروائیوں کا جائزہ لیا۔ وزیراعلیٰ نے ہنگامی بنیادوں پر بجلی، پانی اور رابطہ سڑکوں کی بحالی کی ہدایات جاری کیں۔
چرواہے اور ریسکیو کارکنوں کیلئے انعامات کا اعلان
ترجمان فیض اللہ فراق کے مطابق، گلیشیئر پھٹنے کی بروقت اطلاع دینے والے چرواہے کو وزیراعلیٰ سیکرٹریٹ میں بلا کر نقد انعام اور تعریفی سرٹیفکیٹ دیا جائے گا۔ اسی طرح غذر دائن میں بہترین ریسکیو کرنے والے نوجوان کو بھی انعام سے نوازنے کا فیصلہ کیا گیا ہے۔
مستقل بحالی اور انفراسٹرکچر کی تعمیر
ترجمان نے مزید بتایا کہ متاثرین کے لیے مستقل بنیادوں پر متبادل گاؤں قائم کرنے کی تجویز وزیراعظم پاکستان کو پیش کی جائے گی۔ اس کے ساتھ ساتھ دائن کی آر سی سی پل کی تعمیر کیلئے بھی ہنگامی اقدامات کیے جائیں گے۔
انہوں نے کہا کہ بدقسمتی سے ضلع غذر میں ارلی وارننگ سسٹم فعال نہیں ہے، تاہم ایک چرواہے کی بروقت اطلاع سے سیکڑوں انسانی جانیں بچ گئیں۔ حکومت کی کوشش ہے کہ مستقبل میں ایسے نقصانات سے بچنے کیلئے جدید نظام قائم کیا جائے۔
