نئی دہلی (سپورٹس ڈیسک)  ایشیا کپ 2025 کے سب سے بڑے مقابلے پاکستان اور بھارت کے درمیان 14 ستمبر کو ہونا ہے، جس کا شائقین بےصبری سے انتظار کر رہے ہیں۔ ٹورنامنٹ 9 ستمبر کو متحدہ عرب امارات (یو اے ای) میں شروع ہوگا، جہاں بھارتی ٹیم اپنا پہلا میچ 10 ستمبر کو میزبان یو اے ای کے خلاف کھیلے گی جبکہ پاکستان 12 ستمبر کو اومان کے خلاف میدان میں اترے گا۔

بھارت میں پہلے پاک بھارت میچ کے بائیکاٹ کی باتیں کی جا رہی تھیں اور خدشہ تھا کہ کشیدگی کے باعث ایونٹ متاثر ہوسکتا ہے۔ تاہم بھارتی وزارتِ کھیل نے وضاحت دی ہے کہ ایشیا کپ کے دوران پاکستان کے خلاف میچ شیڈول کے مطابق ہوگا، البتہ دونوں ملکوں کے درمیان دوطرفہ سیریز پر پابندی برقرار رہے گی۔

اسی فیصلے پر سابق بھارتی کرکٹر منوج تیواری نے شدید مایوسی کا اظہار کیا ہے۔ انہوں نے بھارتی میڈیا سے گفتگو میں کہا:

“انسانی جان کی قیمت صفر ہے۔ مجھے حیرت ہے کہ یہ میچ کھیلا جارہا ہے۔ پہلگام حملے کے بعد کہا گیا تھا کہ سخت جواب دیا جائے گا، مگر چند ماہ بعد سب بھلا دیا گیا۔ کھیل سے بڑھ کر انسانی جان کی قدر ہونی چاہیے۔ میرے لیے ناقابلِ یقین ہے کہ یہ میچ ہوگا۔ میں تو یہ میچ بالکل بھی نہیں دیکھوں گا۔”