لاہور(سپورٹس ڈیسک) سابق فاسٹ بولر اور کپتان وسیم اکرم نے کہا ہے کہ 14 ستمبر کو دبئی میں شیڈول ایشیا کپ کے روایتی حریفوں کے میچ میں فضا خاصی گرم ہو سکتی ہے۔ انہوں نے کھلاڑیوں اور شائقین سے پرزور کہا کہ نظم و ضبط قائم رکھیں اور حد سے آگے نہ بڑھیں۔

وسیم اکرم نے کہا کہ بھارت اور پاکستان کے میچ کروڑوں شائقین دیکھتے ہیں اور یہ ہمیشہ دلچسپ ہوتے ہیں۔ انہوں نے واضح کیا کہ حب الوطنی کا مطلب کھیل کے دائرے سے باہر جذبات ظاہر کرنا نہیں، شائقین کو اپنی ٹیم کی حمایت کرتے ہوئے بھی میچ کا احترام کرنا چاہیے۔

سابق کپتان نے بھارت کو اس میچ کا فیورٹ قرار دیا اور کہا کہ پاکستان نے گزشتہ برسوں میں بھارت کے خلاف مستقل کامیابیاں حاصل نہیں کیں، البتہ ٹی ٹوئنٹی فارمیٹ میں گرین شرٹس کے پاس مواقع موجود ہیں۔ پاکستان نے 2021 کے ورلڈ کپ اور 2022 کے ایشیا کپ میں بھارت کو شکست دی تھی۔

وسیم اکرم نے مزید کہا کہ بھارت حالیہ فارم میں بہتر ہے، لیکن میچ کا اصل فیصلہ اس وقت ہوگا کہ کونسی ٹیم دباؤ کو بہتر طریقے سے سنبھالتی ہے۔