کہتے ہیں قسمت کبھی بھی، کہیں سے بھی دستک دے سکتی ہے — کچھ ایسا ہی چین کے صوبے یوننان میں ایک خاتون کے ساتھ پیش آیا، جو بارش سے بچنے کے لیے ایک لاٹری شاپ میں داخل ہوئیں اور اچانک کروڑوں روپے کی مالک بن گئیں۔
واقعہ Yuxi شہر کا ہے، جہاں ایک خاتون (جنہوں نے اپنی شناخت ظاہر نہ کرنے کی درخواست کی) بارش کے دوران سڑک پر موجود تھیں۔ اچانک موسلا دھار بارش شروع ہو گئی، اور وہ بھیگنے سے بچنے کے لیے ایک قریبی لاٹری ٹکٹ فروخت کرنے والی دکان میں جا گھسیں۔
بارش رکنے کا انتظار کرتے ہوئے خاتون نے دکاندار سے دریافت کیا کہ آیا اس کے پاس اسکریچ کارڈز ہیں؟ ان کا کہنا تھا، “جب تک بارش رُکے، کیوں نہ کچھ دیر کھیل ہی لیا جائے۔” چنانچہ انہوں نے 900 یوان مالیت کے 30 اسکریچ کارڈز خریدے، اور چھٹا کارڈ کھرچتے ہی ان کی قسمت جاگ اٹھی — 10 لاکھ یوان (تقریباً 4 کروڑ پاکستانی روپے) کا انعام نکل آیا۔
خاتون نے میڈیا کو بتایا، “جیسے ہی میں نے انعام جیتا، میرے ہاتھ پاؤں کانپنے لگے۔ مجھے یقین نہیں آ رہا تھا کہ صرف بارش سے بچنے کے لیے اٹھایا گیا ایک قدم میری زندگی بدل دے گا۔”
دلچسپ بات یہ ہے کہ یہ خاتون کبھی کبھار شوقیہ اسکریچ کارڈز خریدتی رہی ہیں، لیکن اس دن تو وہ صرف دوپہر کا کھانا کھا کر نکلی تھیں — قسمت نے انہیں کروڑ پتی بنا دیا۔
انعام جیتنے کے بعد انہوں نے دکان کے مالک کو شکریے کے طور پر ایک لفافہ اور ریشمی بینر دیا، مگر اپنی خوشی کو زیادہ تشہیر دینے سے گریز کیا۔ انہوں نے سوشل میڈیا پر یہ خبر شیئر نہ کرنے کا فیصلہ کیا اور میڈیا سے بھی گزارش کی کہ ان کی شناخت ظاہر نہ کی جائے۔
ان کا کہنا تھا  میں اپنی زندگی سادگی سے گزارتی رہی ہوں، اور اب بھی چاہتی ہوں کہ سب کچھ پہلے جیسا رہے۔ انعام کا مطلب یہ نہیں کہ زندگی کی اصل ترجیحات بدل جائیں۔