لاہور (اسپورٹس ڈیسک) پرو ہاکی لیگ کے لیے حکومت کی جانب سے 25 کروڑ روپے کی معاونت کے باوجود پاکستان ہاکی فیڈریشن شدید مالی بحران سے دوچار ہے۔ ذرائع کے مطابق فیڈریشن کھلاڑیوں کے ڈیلی الاؤنس بھی ادا کرنے میں ناکام رہی ہے اور فنڈز اکٹھا کرنا اس کے لیے مشکل ہو رہا ہے۔

پرو لیگ کے صرف ایک ایڈیشن کے اخراجات کے لیے فیڈریشن کو مزید 10 کروڑ روپے درکار ہیں۔

قومی ٹیم آئندہ برس ورلڈکپ کوالیفائر، ایشین چیمپئنز ٹرافی اور ایشین گیمز میں شرکت کرے گی، جبکہ ورلڈکپ کے لیے کوالیفائی کرنے کی صورت میں وہاں بھی نمائندگی ضروری ہوگی۔ اس کے علاوہ اولمپک کوالیفائرز بھی شیڈول میں شامل ہیں، ساتھ ہی جونیئر اور ایج گروپ ٹیموں کے مختلف ایونٹس کے اخراجات بھی برداشت کرنا ہوں گے۔

ذرائع کا کہنا ہے کہ صرف ان ایونٹس کے لیے پاکستان ہاکی فیڈریشن کو ایک سال میں 30 سے 35 کروڑ روپے درکار ہیں، جبکہ مجموعی طور پر کم از کم 45 کروڑ روپے اکٹھے کرنا ناگزیر ہے۔

ذرائع نے مزید بتایا کہ اگر پاکستان ہاکی فیڈریشن اپنی اہلیت ثابت نہ کر سکی تو اسے دوبارہ حکومت کی طرف دیکھنا ہوگا، یہی وجہ ہے کہ کثیر رقم کی ضرورت نے فیڈریشن کو شدید مشکلات میں ڈال دیا ہے۔