اسلام آباد (ویب ڈیسک) وزیر دفاع خواجہ آصف نے کہا ہے کہ سڑکوں اور پلوں کی تعمیر میں کرپشن کے باعث یہ منصوبے ایک بارش میں ہی تباہ ہو جاتے ہیں۔

نجی ٹی وی سے گفتگو میں انہوں نے الزام عائد کیا کہ ترقیاتی منصوبوں میں صرف 20 سے 30 فیصد رقم استعمال ہوتی ہے جبکہ باقی رقم ٹھیکیدار اور منصوبہ ساز کھا جاتے ہیں۔ ان کے مطابق سیالکوٹ میں تباہی کی بڑی وجہ نالوں پر تجاوزات ہیں۔

خواجہ آصف نے مزید کہا کہ خطرہ ابھی ٹلا نہیں، ہیڈ مرالہ، خانکی اور قادر آباد کے مقامات پر مزید سیلاب کی پیشگوئی موجود ہے۔ انہوں نے کہا کہ بھارت کی بدنیتی ضرور ہو سکتی ہے لیکن اتنے بڑے پیمانے پر پانی روکنا کسی کے بس میں نہیں۔

وزیر دفاع کا کہنا تھا کہ گزشتہ دو تین دہائیوں سے انسان قدرتی نظام میں مداخلت کر رہا ہے جس کی قیمت ہم سب ادا کر رہے ہیں۔ ان کا کہنا تھا کہ آبی گزرگاہوں پر تعمیرات حکومت کی ناکامی کو ظاہر کرتی ہیں۔

انہوں نے زور دیا کہ سب کو سوچنا چاہئے کہ عوام کی دولت کب عوام پر مکمل طور پر خرچ ہوگی۔ ان کے مطابق وزیراعظم اور پنجاب حکومت کا اولین ایجنڈا یہ ہے کہ سرکاری پیسہ 100 فیصد ملکی ترقی پر صرف ہو۔