شارجہ (اسپورٹس ڈیسک) سہ فریقی سیریز کے افتتاحی میچ میں پاکستان اور افغانستان آمنے سامنے آئے تو افغان شائقین نے ایک بار پھر بدتمیزی کا مظاہرہ کیا۔ میڈیا رپورٹس کے مطابق متعدد افراد بغیر ٹکٹ اسٹیڈیم میں داخل ہوگئے اور شائقین کے لیے مختص مرکزی دروازہ بھی توڑ دیا۔

اسٹیڈیم انتظامیہ نے ماضی کے ناخوشگوار واقعات کو دیکھتے ہوئے پاک افغان شائقین کے لیے الگ الگ اسٹینڈز، پویلینز اور راستے مختص کیے تھے۔ یہاں تک کہ ٹکٹس کے رنگ بھی مختلف رکھے گئے، مگر اس کے باوجود بدنظمی پیش آئی۔

میچ میں پاکستان نے شاندار کارکردگی دکھاتے ہوئے افغانستان کو 39 رنز سے شکست دے دی۔ قومی ٹیم آج سیریز کا دوسرا میچ متحدہ عرب امارات کے خلاف کھیلے گی۔