ہیوسٹن (نیوزڈیسک) امریکہ میں ایک 11 سالہ بچہ معمولی سی شرارت کے دوران جان سے ہاتھ دھو بیٹھا۔ یہ افسوسناک واقعہ ہفتہ کی رات شہر ہیوسٹن کے مشرقی علاقے ریسین اسٹریٹ پر پیش آیا، جب کچھ بچے گھروں کی ڈور بیل بجا کر بھاگنے کا کھیل کھیل رہے تھے۔

پولیس کے مطابق رات تقریباً گیارہ بجے ایک مکان سے 42 سالہ شخص باہر نکلا اور بچوں پر اندھا دھند فائرنگ شروع کر دی۔ بچے اپنی جان بچانے کے لیے بھاگ گئے، لیکن ایک 11 سالہ لڑکا گولی لگنے سے شدید زخمی ہوگیا۔ اسے فوری طور پر اسپتال منتقل کیا گیا، مگر زخموں کی تاب نہ لاتے ہوئے وہ دم توڑ گیا۔

فائرنگ کے بعد پولیس نے علاقے کو گھیرے میں لے کر کارروائی کی اور مشتبہ شخص کو ہتھیار ڈالنے کا کہا۔ ملزم نے رضاکارانہ طور پر خود کو حکام کے حوالے کر دیا۔ پولیس نے اس کے گھر کی تلاشی کے دوران متعدد رائفلیں اور ہینڈ گنز برآمد کیں۔

امریکی میڈیا کے مطابق واقعے کی تفتیش جاری ہے اور ملزم کو جلد عدالت میں پیش کیا جائے گا۔ حکام کا کہنا ہے کہ اس واقعے نے بچوں کے معمولی مذاق کو بھی جان لیوا ثابت کرنے کے خطرات پر ایک بار پھر سوال کھڑا کر دیا ہے، خاص طور پر ایسے معاشرے میں جہاں گھروں میں ہتھیاروں کی موجودگی عام ہے۔