وزارتِ مواصلات میں بڑے پیمانے پر مالی بے ضابطگیوں کا انکشاف ہوا ہے۔ آڈیٹر جنرل آف پاکستان کی تازہ رپورٹ کے مطابق، وزارت میں مجموعی طور پر 78 ارب روپے سے زائد کی مالی بے قاعدگیاں ریکارڈ کی گئی ہیں، جن میں سے 50 ارب روپے کی بے ضابطگیاں صرف پاکستان پوسٹ میں پائی گئیں۔
پاکستان پوسٹ میں چوری، کرپشن اور غیر شفاف خریداری
رپورٹ کے مطابق صرف پاکستان پوسٹ میں 28 کروڑ 42 لاکھ روپے کی چوری اور کرپشن کی نشاندہی کی گئی ہے۔
ایچ آر ڈیپارٹمنٹ میں بھی 1 ارب 25 کروڑ 69 لاکھ روپے کی بے ضابطگیاں پائی گئیں۔
مختلف خریداریوں میں 2 ارب 84 کروڑ روپے کی سنگین خلاف ورزیاں ریکارڈ ہوئیں، جن میں پبلک پروکیورمنٹ کے قواعد (PPRA رولز) کی خلاف ورزی شامل ہے۔
دیگر مالی نقصانات اور ریکوری کی ناکامی
آڈٹ رپورٹ میں یہ بھی انکشاف کیا گیا ہے کہ وزارت کے کمرشل بینکوں میں اکاؤنٹس رکھنے کی وجہ سے 4 ارب 58 کروڑ روپے کا نقصان ہوا۔
مختلف 12 کیسز میں 9 ارب 42 کروڑ روپے کی رقوم کی عدم ریکوری سامنے آئی۔
جبکہ 13 کیسز میں 58 ارب روپے سے زائد کی بے ضابطگیوں کی نشان دہی کی گئی ہے۔
 آڈیٹر جنرل کی سفارشات
آڈیٹر جنرل نے رپورٹ میں متعدد اہم سفارشات پیش کی ہیں، جن میں شامل ہیں
پاکستان پوسٹ میں ذمہ دار افراد کے خلاف فوری کارروائی کی جائے۔
تمام خریداریوں میں PPRA رولز کی سختی سے پابندی کو یقینی بنایا جائے۔
خسارے میں چلنے والے ڈاک خانوں کو منافع بخش بنانے کے لیے مؤثر اقدامات اٹھائے جائیں۔