پنجاب کی وزیر اطلاعات عظمیٰ بخاری نے سینیئر سیاستدان ندیم افضل چن کے حالیہ بیانات پر سخت ردِعمل دیتے ہوئے انہیں تنقید کا نشانہ بنایا ہے۔
سماجی رابطے کی ویب سائٹ ایکس (سابقہ ٹوئٹر) پر بیان دیتے ہوئے عظمیٰ بخاری نے کہاکہ چن صاحب! آپ تو ایک سلجھے ہوئے شخص تھے، لیکن چند دنوں سے نہ جانے کس ذہنی تناؤ کا شکار ہیں یا جان بوجھ کر پنجاب کے خلاف جھوٹا پراپیگنڈا کر رہے ہیں۔
انہوں نے مزید کہا کہ قرضوں سے متعلق جو بے بنیاد خبر پھیلائی جا رہی ہے، اس کی وضاحت وہ 26 اگست کو میڈیا کے سامنے کر چکی ہیں۔ ان کا کہنا تھا کہ یہ جھوٹا بیانیہ پیکا ایکٹ اور پنجاب ہتکِ عزت قانون کے تحت آتا ہے، اور امید ہے چن صاحب عدالت میں اس خبر کو سچ ثابت کر سکیں گے۔ یاد رہے کہ ندیم افضل چن نے میڈیا سے گفتگو میں حکومت کو سخت تنقید کا نشانہ بناتے ہوئے کہا تھا کہ بے نظیر انکم سپورٹ پروگرام کا ڈیٹا سیاست کی نذر نہیں ہونا چاہیے۔ حکومت کی پالیسیاں معاشرے میں بے چینی اور دباؤ پیدا کر رہی ہیں۔ ن لیگ کو کسانوں کی مدد کرنی چاہیے، انگلیاں توڑنے کی نہیں۔ سیلاب زدہ کسانوں کو فوری امداد دی جائے، اورفی ایکڑ ایک لاکھ روپے کا ریلیف دیا جائے تاکہ وہ نئی فصل کی تیاری کر سکیں۔
انہوں نے مزید کہا کہ پیپلز پارٹی ہمیشہ جمہوریت اور پارلیمنٹ کے استحکام کی حامی رہی ہے، اور موجودہ حکومت کی کارکردگی عوام کو ذہنی دباؤ میں مبتلا کر رہی ہے۔