پاکستان کے سابق کپتان اور سوئنگ کے سلطان وسیم اکرم نے بھارتی میڈیا کو آڑے ہاتوں لے لیا۔
فوٹوز اینڈ ویڈیوز شیئرنگ پلیٹ فارم انسٹاگرام پر سابق کپتان نے بھارتی میڈیا کو ہم نام جاسوس پکڑے جانے پر ، جاسوس کے بجائے ان کی تصویر استعمال کرنے پر سخت تنقید کی اور کہا کہ اگر آپ اتنے ہی ڈیڑھ ہوشیار ہیں تو پہلے خبر کی تصدیق کرلیا کریں۔
سوشل میڈیا پر ویڈیو پیغام جاری کرتے ہوئے سابق کھلاڑی نے صارفین سے بھی درخواست کی کوئی بھی تبصرہ کرنے سے قبل تصدیق کرلیں۔
View this post on Instagram
انہوں نے اپنے ویڈیو پیغام میں کہا کہ میں سوشل میڈیا استعمال کرنے والوں کو مشورہ دوں گا کہ سوشل میڈیا پر ہر وسیم اکرم میں نہیں، جعلی اکاؤنٹ یا یپریڈی اکاؤنٹ کے حوالے سے پہلے تصدیق کرلیں۔
ان کا کہنا تھا کہ پڑوسی ملک میں وسیم اکرم نامی جاسوس پکڑا گیا ہے اور ان کا میڈیا میری تصویر لگا رہا ہے اور صارفین بھی بغیر تصدیق تبصرے کر رہے ہیں۔
وسیم اکرم نے بھارتی میڈیا کو مشورہ دیتے ہوئے کہا کہ اپنی جان پر عذاب نہ ڈالیں، پُرسکون رہیں، پہلے چیک کرلیں۔
واضح رہے کہ گزشتہ ہفتے بھارتی میڈیا نے ہریانہ سے وسیم اکرم نامی یوٹیوبر کو جاسوسی کے الزام میں گرفتار کیا تھا، تاہم مذکورہ یوٹیوبر کے بجائے سستی شہرت کے لیے پاکستان کے سابق کپتان وسیم اکرم کی تصویر استعمال کی تھی۔
