پاکستانی اداکارہ سجل علی کی جانب سے اپنے سابقہ شوہر اور معروف اداکار احد رضا میر کو ایکس (سابقہ ٹوئٹر) پر فالو کیے جانے کی خبر سامنے آتے ہی سوشل میڈیا پر نئی بحث نے جنم لے لیا ہے۔ سجل علی کے غیر تصدیق شدہ ایکس اکاؤنٹ پر دیکھا گیا کہ وہ تاحال احد رضا میر کو فالو کر رہی ہیں، جس پر صارفین نے مختلف آرا کا اظہار کرنا شروع کر دیا۔
کچھ صارفین کا کہنا ہے کہ چونکہ سجل طویل عرصے سے ایکس پر غیر فعال ہیں، اس لیے ممکن ہے کہ علیحدگی کے باوجود وہ احد کو ان فالو کرنا بھول گئی ہوں۔ جب کہ کئی صارفین کا خیال ہے کہ دونوں کے درمیان قانونی طور پر طلاق ہوئی ہی نہیں، بلکہ یہ محض ایک وقتی معاہدہ یا دوری ہے، جو مستقبل میں ختم ہوسکتی ہے۔ ان قیاس آرائیوں کے باوجود تاحال کسی جانب سے اس حوالے سے کوئی تصدیق یا تردید سامنے نہیں آئی۔
یاد رہے کہ سجل علی اور احد رضا میر کی شادی 14 مارچ 2020 کو ابوظبی میں ہوئی تھی، اور یہ جوڑی پاکستانی شوبز انڈسٹری کی مقبول ترین جوڑیوں میں شمار ہوتی رہی ہے۔ تاہم 2021 کے آخر اور 2022 کے اوائل سے ان کے درمیان علیحدگی کی خبریں گردش میں ہیں، مگر کئی سال گزرنے کے باوجود دونوں اداکاروں نے اپنے تعلق کے حوالے سے کوئی واضح بیان نہیں دیا۔
رواں برس کے آغاز میں احد رضا میر نے سجل کے کام کی کھل کر تعریف کی، جب کہ سجل علی بھی حال ہی میں احد کے والد، سینئر اداکار آصف رضا میر کے ساتھ ایک پراجیکٹ میں کام کرتی نظر آئیں۔ اسی حوالے سے گفتگو کرتے ہوئے آصف رضا میر نے ایک انٹرویو میں کہا تھا کہ ہم پروفیشنل آرٹسٹ ہیں، رشتے ختم ہو سکتے ہیں لیکن عزت اور احترام باقی رہنا چاہیے۔ ان کا کہنا تھا کہ رشتے بننا اور ٹوٹنا زندگی کا حصہ ہے، مگر اصل عظمت اس میں ہے کہ پرانے زخموں کو کریدنے کے بجائے وقار کے ساتھ آگے بڑھا جائے۔
سجل اور احد کے تعلق کے حوالے سے سوشل میڈیا پر ایک بار پھر سوالات اٹھنے لگے ہیں، مگر سچائی کیا ہے، یہ ابھی تک پردۂ راز میں ہے۔