وزیراعظم شہباز شریف کی زیر صدارت اعلیٰ سطح اجلاس میں فیصلہ کیا گیا ہے کہ اب پاکستان میں صرف وہی افغان شہری قیام کر سکیں گے جن کے پاس باقاعدہ ویزا ہوگا۔ اجلاس میں افغان مہاجرین کی واپسی، سرحدی سیکیورٹی اور افغانستان کی جانب سے دراندازی پر تفصیلی غور کیا گیا۔
اجلاس میں پنجاب، سندھ، بلوچستان اور گلگت بلتستان کے وزرائے اعلیٰ، وزیراعظم آزاد کشمیر اور وفاقی وزراء شریک ہوئے، جبکہ خیبر پختونخوا کے وزیر اعلیٰ سہیل آفریدی کی عدم شرکت کے باعث ان کی نمائندگی مزمل اسلم نے کی۔
اجلاس میں افغان مہاجرین کی وطن واپسی کے جاری عمل پر بریفنگ دی گئی، جس میں بتایا گیا کہ 16 اکتوبر 2025 تک 14 لاکھ 77 ہزار 592 افغان باشندوں کو وطن واپس بھیجا جا چکا ہے۔ بریفنگ کے مطابق افغان شہریوں کو کسی قسم کی مزید مہلت نہیں دی جائے گی، اور ان کی واپسی کا عمل تیزی سے مکمل کیا جائے گا۔ اس مقصد کے لیے افغانستان کے ساتھ ملحقہ ایگزٹ پوائنٹس کی تعداد بھی بڑھائی جا رہی ہے تاکہ واپسی کا عمل سہولت سے مکمل ہو سکے۔
وزیراعظم نے واضح کیا کہ پاکستان میں اب صرف ان افغان شہریوں کو رہنے کی اجازت ہوگی جن کے پاس ویزا ہوگا۔ اجلاس میں یہ بھی طے پایا کہ غیر قانونی افغان مہاجرین کو پناہ دینا یا انہیں گیسٹ ہاؤسز میں قیام کی اجازت دینا قانوناً جرم تصور کیا جائے گا، اور اس پر سختی سے عمل درآمد کیا جائے گا۔
وزیراعظم شہباز شریف نے ہدایت کی کہ غیر قانونی افغان مہاجرین کی وطن واپسی کے دوران بزرگوں، خواتین اور بچوں سے باعزت اور شائستہ سلوک روا رکھا جائے۔
اس موقع پر وزیراعظم نے گفتگو کرتے ہوئے کہاکہ عوام ہم سے سوال کرتے ہیں کہ آخر حکومت کب تک افغان مہاجرین کا بوجھ اٹھاتی رہے گی؟ پاکستان نے دہائیوں تک افغان بھائیوں کی میزبانی کی، اب وقت آ گیا ہے کہ اس مسئلے کو منظم اور قانونی دائرے میں حل کیا جائے۔
انہوں نے یہ بھی بتایا کہ خیبر پختونخوا کے نئے وزیر اعلیٰ سہیل آفریدی سے ٹیلی فون پر گفتگو ہوئی ہے، انہیں عہدہ سنبھالنے پر مبارکباد دی گئی اور وفاق کی جانب سے مکمل تعاون کی یقین دہانی کروائی گئی۔ شہباز شریف نے کہا کہ خیبر پختونخوا وفاق کی ایک اہم اکائی ہے اور عوام کی فلاح و ترقی کے لیے مرکز اور صوبے کو مل کر کام کرنا ہوگا۔